Bu gün Mətbuat Şurasında jurnalistlər üçün yeni təhlükəsizlik gödəkçələri paylanıb.

Musavat.com xəbər verir ki, MŞ sədri Əflatun Amaşov media kapitanlarının və jurnalistlərin iştirakı ilə yeni gödəkçə barədə məlumat verib.

O, deyib ki, MŞ ilə Daxili İşlər Nazirliyi uzun müddətdir layihə həyata keçirir:

"Küçə aksiyaları zamanı monitorinqlər aparılır. Ayrı-ayrı redaksiyalarda çalışan jurnalistlər də aksiyaları işıqlandırırlar. Bu zaman onların fəaliyyətini və təhlükəsizliyini təmin etmək üçün qrupun üzvləri orda olur. Məqsəd elə odur ki, jurnalistlər orada olanda heç bir problem yaranmasın. Təhlükəsizlik gödəkçələri də buna xidmət edir".

Ə.Amaşov deyib ki, bu dəfə üçün 300 gödəkçə hazırlanıb və hər redaksiyaya onların küçə aksiyalarına münasibət dərəcəsinə görə gödəkçələr paylanacaq:

"Aktiv redaksiyalara daha çox verəcəyik. Bu günkü tədbir gödəkçələrin ilk partiyası barədə məlumat vermək xarakteri daşıyırdı. Ümumilikdə bu gün hər redaksiyaya bir ədəd gödəkçə paylanacaq".