Quba rayonunun ucqar yaşayış məntəqələrinə dolu yağıb.

Axar.az xəbər verir ki, dəniz səviyyəsindən 1200 metrdən yüksəklikdə yerləşən Aydınkənd yaşayış məntəqəsinin sakinləri Azərtac-a bildiriblər ki, iyirmi dəqiqə ərzində yağan güclü dolu tərəvəz və otlaq sahələrinə ciddi ziyan vurub.

Sakinlər iyun ayında belə dolu yağmasına nadir hallarda rast gəldiklərini qeyd ediblər.

Qəfil başlayan dolu təsərrüfat sahələrinə ziyan vurmaqla yanaşı, bir müddət əvvəl ərazidə baş verən sürüşmə prosesini də aktivləşdirib. Dağlardan qopan daş və qaya parçaları bəzi həyətyanı sahələrə tökülüb.

Faktla bağlı yerli icra hakimiyyəti qurumları məlumatlandırılıb.