Bakı-Qroznı reysini yerinə yetirən AZAL təyyarəsinin Rusiya tərəfindən vurulmasından sonra Çeçenistanın başçısı Ramzan Kadırov ilk dəfə Azərbaycana səfər edib. Kadırovun Bakıya niyə indi gəlişini Moskva və Qroznının maraqları kontekstində qiymətləndirmək olar.

Azərbaycan-Rusiya münasibətlərində son dövrlər normallaşma müşahidə edilsə də, xüsusilə Əliyevlə Putinin təmasları fonunda, təyyarə məsələsi həll edilməmiş problem olaraq qalır. Moskva İrəvanla qarşıdurmanın davam etdiyi, ABŞ-ın bölgəyə gəldiyi vaxt Bakı ilə normallaşdırmaq istədiyi münasibətlərdə təyyarə məsələsinin maneəyə çevrilməsini istəmir. Mümkündür ki, Kreml Kadırovun Bakıya səfəri və Əliyevin qəbulunda birbaşa başsağlığı verməsi ilə təyyarə məsələsini ən azı müəyyən müddətdə problem olmaqdan çıxarmağa çalışır. Bununla həm də Bakının mövqeyini yumşaltmaq gedişi edir.

Burada Kadırovun da öz maraqlarının olduğu görünür.

Birincisi, təyyarən böhranında “günah keçisi” olmaq istəmir.

Təyyarənin vurulmasından sonra Rusiya hərbi elitasında məsələni lokal müstəviyə keçirmək, məsuliyyəti Qroznının üzərinə qoymaq və Kadırovu “qalxana” çevirmək variantı da aktual idi. Lakin Bakının cavabdehin birbaşa Moskva olmasında israrlı mövqeyi bu variantı sıradan çıxartdı. Kadırov Bakıya səfəri təyyarə böhranında günahkar olmaq variantından yayınmaq üçün fürsət olaraq görür.

İkincisi, Kadırov Qafqazın şimalında cənubla münasibətlərdəki dominant mövqeyini saxlamağa çalışır.

Təyyarə böhranı Qroznının bu üstünlüyünə risklər yaratmışdı və Kadırov Əliyevin qəbulunda olmaqla təkcə Moskvanın missiyasını icra etmir, həm də regionun cənubu ilə münasibətlərin qurulmasındakı mövqelərini qorumaq imkanı qazanır.

Kadırovun Bakıda yüksək səviyyədə qəbulu da təsadüfi deyil, çünki Azərbaycan üçün Çeçenistan Şimali Qafqaz siyasətində əhəmiyyətli subyektdir. Və Bakı bununla bir daha təyyarə məsələsinə görə cavabdehin Qroznı olmadığı mesajını verir.