Xəbər verdiyimiz kimi, Bakı Metropoliteni QSC tərəfindən xətlərin ayrılması layihəsi çərçivəsində “28 May” və “Nizami” stansiyaları arasında qatarların hərəkəti müvəqqəti dayandırılıb və metroda hərəkətin dayandırılması ilə əlaqədar sərnişin daşımalarında yarana biləcək əlavə yükün qarşılanması məqsədilə AYNA tərəfindən ekspress avtobusları ayrılıb.

Sözügedən işlərlə əlaqədar artıq günlərdir Bakıda ciddi sıxlıq, avtobusların intervalında isə gecikmələr müşahidə olunur.

Sabahdan növbəti tədris ilinin başlayacağını nəzərə alsaq, yollarda vəziyyətin heç də ürəkaçan olmayacağını proqnozlaşdırmaq olar.

Yollarda vəziyyəti çətinləşdirəcək daha bir amil isə valideynlərin bəzən öz övladlarını yaşadıqları ərazidən xeyli uzaqda yerləşən məktəblərə qoymasıdır.

Təhsil eksperti Elçin Əfəndi Axar.az-a açıqlamasında bildirib ki, nəqliyyatla bağlı düzgün tənzimlənmə olmadığı halda yollarda sıxlıq daha da çox olacaq:

“Ona görə də valideynlər daha yaxın məktəblərə üstünlük verməlidir. Çünki ən yaxşı məktəb yaxında olan məktəbdir. Bu prinsipə riayət etmək lazımdır. Övladlarını daha uzaqda yerləşən məktəblərə göndərdikdə yollarda daha çox sıxlıq yaranır və şagird daha çox əziyyət çəkir”.