Həyətində narkotik vasitə əkən şəxs məhkəmədə əməlini etiraf edib. O, narkotik vasitə istifadəçisi olduğu üçün atasının evinin həyətyanı sahəsində narkotik bitkilər əkdiyini söyləyib.

Musavat.com xəbər verir ki, Bakı Ağır Cinayətlər Məhkəməsində qanunsuz olaraq tərkibində narkotik maddələr olan bitkiləri əkməkdə təqsirləndirilən Arif Soltanovun cinayət işi üzrə məhkəmə prosesi keçirilib.

İttiham aktı üzrə özünü təqsirli bilən A.Soltanov narkotik bitkilərin toxumlarını Nardaran və Maştağa qəsəbələrində olduğu toy məclislərində tanışlarından əldə etdiyini bildirib.

Məhkəmədə şahid və hal şahidləri ifadə veriblər. Təqsirləndirilən şəxs şahidlərin və hal şahidinin dediklərini təsdiqləyib.

Məhkəmədə məlum olub ki, A.Soltanov Nardaranda ata evinin həyətyanı sahəsində 93 ədəd narkotik bitkilər əkib.

A.Soltanov Cinayət Məcəlləsinin 237-ci (qanunsuz olaraq tərkibində narkotik maddələr olan bitkiləri əkmək) maddəsi ilə ittiham olunur.