"Qanunun tələblərinə görə, insan orqanları və toxumaları alğı-satqı obyekti ola bilməz".

Bu sözləri "Axar.az"a hüquqşünas Müzəffər Baxışov yerli qəzetlərin birində gedən orqan satışı elanına münasibət bildirərkən dedi.

​

Onun sözlərinə görə, Konstitusiyanın 17-ci maddəsinə görə, insan orqan və toxumalarının satışı ilə məşğul olan hüquqi və fiziki şəxslər qanunvericilikdə müəyyən edilmiş qaydada məsuliyyət daşıyırlar:

"Bununla bağlı Cinayət Məcəlləsinin 137-ci maddəsində cinayət məsuliyyəti nəzərdə tutulub".

Hüquqşünas qeyd edir ki, Konstitusiyanın 16-cı maddəsinə görə transplantasiya haqqında reklamı qanunvericilikdə müəyyən edilmiş qaydada yalnız tibb və əczaçılıq sahəsində ixtisaslaşmış mətbuat orqanları həyata keçirə bilər: "Əgər orqan alğı-satqı elanını tibb və əczaçılıq sahəsində ixtisaslaşmamış mətbu orqan həyata keçirirsə, qanunsuz reklama yol verdiyinə görə o, cinayət məsuliyyətinə cəlb edilməlidir".

M.Baxışov deyir ki, hər bir şəxsin öz orqanlarını könüllü olaraq satışa çıxarmaq haqqı var: "Bu, şəxsin hüququdur. Xəstə şəxsə istənilən insan donor ola bilər".

Xatırladaq ki, ölkənin yerli qəzetlərindən birində orqan alğı-satqı elanı yerləşdirilib. Elanda qaraciyər, böyrək satışı və alışı təklif edilib.