Bakı Dövlət Universitetinin tələbəsi itkin düşüb.

"Axar.az"ın xəbərinə görə, bu barədə Bakı Dövlət Universitetinin ikinci kurs tələbəsi Asim Məmmədovun yaxınları məlumat veriblər. A. Məmmədov şənbə günü evdən internet kluba getmək adı ilə çıxıb və bir daha geri qayıtmayıb.

Xətai Rayon Polis İdarəsinin 34-cü Polis Bölməsindən A.Məmmədovun tapılması istiqamətində iş aparılır.

Hadisəylə bağlı "islamazeri.az"a danışan Asim Məmmədovun anası Samirə xanım deyib ki, "Mobil telefonunun ekranında tabut şəkli qoyulub və altında yazılıb: "Mən, bu həyatda belə yaşamaq istəmirəm. Hər şeyə görə bağışla" (Mətn Rus dilində yazılıb). Mən elə fikirləşirəm ki, o intihar edib. Evdən çıxdıqdan sonra mənimlə əlaqə saxlamayıb. Onu həbs etməyiblər. Bu dəqiqdir. Xətai rayon Polis İdarəsinin 34-cü polis bölməsinə müraciət etmişəm. Polis həbs olunanlar siyahısında və intihar edən naməlum şəxslərin siyahısında adı yoxdur. Üzərində heç bir sənəd götürməyib. 2 gündür əlaqə saxlaya bilmirəm. Xaiş edirəm onun barəsində məlumatı olanlar mənimlə əlaqə saxlasın."

Asim Məmmədovun itkin düşməsi ilə bağlı noyabr ayının 17-də Elnur Radar "feysbuk" səhifəsində bu sözləri yazıb: "2 gündür evdən çıxıb və geri qayıtmayıb. Ailəsi, yaxınları çox narahatdır.

Evdən çıxarkən deyib internetkluba gedirəm. 3-4 manat və metro kartını götürüb. Mobil telefonunu götürməyib və həyatdan çox narazı olduğunu bildirib".

A.Məmmədovun yaxınları onun "İslamazeri.az" saytında ştatdankənar müxbir işlədiyini, Bakı Dövlət Universitetinin ikinci kurs tələbəsi olduğunu bildiriblər.