Azərbaycandakı palçıq vulkanları neft-qaz layları ilə əlaqəli olur, bu baxımdan onların püskürməsi qazın yer səthinə çıxması, yaxınlıqda məhsuldar neft laylarının olması baxımından daim geoloqların diqqətini çəkib.

Axar.az xəbər verir ki, bu sözləri Neft Araşdırmaları Mərkəzinin rəhbəri İlham Şaban qeyd edib. Ekspert xatırladıb ki, bu gün səhər saat 8 və 10 radələrində Qaradağ rayonu ərazisində yerləşən Toraqay palçıq vulkanında 2 püskürmə qeydə alınıb:

“Toraqay Azərbaycandakı ən aktiv palçıq vulkanıdır. 1841-ci ildən bu püskürməyə qədər onun dəfələrlə aktivləşməsi müşahidə edilib. Bu vaxta qədər ən güclü püskürmə Qarasu palçıq vulkanında olub. Belə ki, yanma nəticəsində əmələ gələn alov 100 metr yüksəkliyə qədər qalxıb”.

Ekspsert qeyd edib ki, dünyada mövcud olan 700-ə yaxın palçıq vulkanından 300-ü müasir Azərbaycanın ərazisindədir (bəzi mənbələrə görə, 2000 palçıq vulkanından 344-ü Azərbaycandadır):

“Bunlardan da 140-ı Xəzərin Azərbaycan sektorunda qeydə alınıb. Azərbaycanın 8 adası məhz palçıq vulkanı mənşəlidir, o cümlədən Qara Daşlar adası, hansı ki, hazırda Neft Daşları yatağının kiçik bir hissəsini təşkil edir”.