Bakı avtovağzalında fəaliyyət göstərən ticarət mərkəzi "çökür".

Axar.az-ın məlumatına görə, ticarət mərkəzində iş dayanıb, alver getmir, ticarətçilər qan ağlayır, yer haqlarını belə çətinliklə ödəyə bildiklərini deyirlər. Satıcıların sözlərinə görə, bu yarmarka açıldığı tarixdən bu günə kimi müştəri izdihamı olmayıb, alıcılıq qabiliyyəti olduqca aşağıdır.

Avtovağzal bu əraziyə köçürüləndən sonra güman edilirdi ki, metronun 20 Yanvar stansiyası yaxınlığında olan yarmarkanın bazarı öləcək və müştəri axını yenisinə cəlb olunacaq. Amma 2009-cu ildən bəri fəaliyyət göstərən avtovağzalın ticarət mərkəzində satıcılar üçün vəziyyət çox ağırdır. Satıcıların sözlərinə görə, avtovağzalda səyyar satışla məşğul olanların işi daha rəvan gedir: "Burada obyektlərin çoxu bağlanıb. Kimisi yer pulunu verə bilmir, kimisi ailəsini dolandıra. Camaat yenə də keçmiş Velotrekin yanına gedir. Burda çayxanalar, kafelər babat işləyir. Geyim, məişət avadanlığı, elektronika malları satanların isə işi dayanıb".

​