Azərbaycanda icra başçıları arasında ən “uzunömürlüsü” Xocavənd Rayon İcra Hakimiyyətinin başçısı Eyvaz Hüseynovdur. O, 26 ildir Xocavənd rayonuna rəhbərlik edir.

Axar.az xəbər verir ki, bu il 2 iyul tarixində E.Hüseynovun icra başçısı olmasının 26 ili tamam olub.

Xatırladaq ki, Azərbaycanda E.Hüseynovdan başqa eyni rayonda bu qədər uzun müddət başçı kimi fəaliyyət göstərən ikinci şəxs yoxdur.

E.Hüseynovdan başqa, Qobustan rayon İcra Hakimiyyətinin başçısı Adil Məmmədov da uzun müddət icra başçısı olanlardandır. Lakin A.Məmmədov 1994-2002-ci illərdə Oğuz, 2002-2004-cü illərdə Qəbələ, 2004-2011-ci illərdə Biləsuvar rayon İcra hakimiyyətlərinin başçısı vəzifəsində işləyib. 2011-ci il tarixindən isə Qobustana rəhbərlik edib. Adil Məmmədovun icra başçısı karyerası 23 ildir davam edir.

Şabran rayon İcra Hakimiyyətinin başçısı Novruz Novruzovun da eyni vəzifədəki iş stajı 22 ilə çatır. O, 1995-2002-ci illərdə Lerik rayon İcra Hakimiyyətinin başçısı, 2002-2007-ci illərdə Goranboy rayon İcra Hakimiyyəti başçısı olub. 28.06.2007-ci ildən Şabran rayonuna rəhbərlik edir.