Bakının cənubunda, Bibiheybət məscidi istiqamətində yolda aparılan təmir işlərinin nə zaman yekunlaşacağı açıqlanıb.

Axar.az xəbər verir ki, Azərbaycan Avtomobil Yolları Dövlət Agentliyinin mətbuat katibi Anar Nəcəfli Bibiheybət məscidindən şəhər istiqamətində olan yeni yolda müəyyən deformasiyaların və kiçik həcmli çatların yarandığını bildirib.

A.Nəcəfli deyib ki, əslində keçən həftədən yolun həmin hissəsində hazırlıq işləri aparılıb:

“İki gün əvvəl isə yolda hərəkət tam məhdudlaşdırılıb. Hazırda yolun əsasında bərkitmə işləri görülür, yararsız qrunt qazılaraq çıxarılır, yeni yararlı qrunt tökülür, kipləşdirmə işləri aparılır. Daha sonra isə asfaltlanma işləri aparılacaq. Təqribən 10 gün ərzində bu işlərin yekunlaşdırılması nəzərdə tutulur. Ümumilikdə, yolun 300 metrdən artıq hissəsində bu işlər görülür. Eyni zamanda bu qədər hissədə də səth, yağış sularının axıdılması üçün beton arx inşa olunacaq”.