Gəncə Dövlət Universitetinin sabiq rektoru Yadigar Əliyevlə sələfi Yusif Yusifovun qovğası yenidən qızışıb.

Axar.az-ın xəbərinə görə, Y.Əliyevin dövründə prorektor olmuş Y.Yusifovun onun postuna təyinatından bir ilə yaxın vaxt keçsə də, kompromat savaşı səngimir.

Rektorların bir-biri barəsində mətbuata sızdırdığı məlumatların ardı-arası kəsilmir. "Moderator.az" saytı yazıb ki, 90-cı illərdə Əsmətxanım Məhsəti Gəncə Universiteti adlı bir təhsil müəssisəsi açmağa müvəffəq olub. O vaxt Yadigar Əliyev onun köməkçisi olub. Xanım rektor dikdaban ayaqqabıda gəzə bilmədiyi üçün iş otağında başmaq geyinirmiş. Ona bu məsələdə Y.Əliyev kömək edirmiş. Saytın bu yazısına keçmiş rektor "Mia.az"a yazdığı məktubunda replikalarla cavab verib.

Sabiq rektor yazıb: "Xoş xatirələr var. Rektorun ictimai nəqliyyatla işə gedib-gəlməyi, vaxtaşırı universitetimizin müxtəlif istiqamətlərdə yerləşən korpuslarına tək-tənha piyada baş çəkməyi, qəflətən dərslərə girmək, Feysbuk səhifəsində tələbələrin göndərdikləri məktublar, rektorun mobil telefon nömrəsini bütün tələbələr, müəllimlər və universitetin əksər əməkdaşlarının əzbər bilməsi və s.

Yadigar Əliyev qadınlara, yaşca və vəzifəcə böyüklərə həmişə hörmət göstərib. Ancaq ali məktəbdəki iş yerində heç kim ayaqqabısını çıxarıb "şap-şap" geyinmir. Yadigar Əliyevin də hər gün ayaqqabısını çıxarıb, "şap-şap" geyinməyinə yardım göstərdiyi, hətta ayaqlarını yuyub-quruladığı yeganə qadın isə anasıdır.

O ki qaldı mərhəmətli qəlbə sahib olmaqda ad çıxarmağıma, qoy buna mənim rektor olduğum dövrdə GDU-da təhsil almış tələbələr, onların valideynləri münasibət bildirsin, səsimə səs versinlər".