Ağsu Rayon İcra Hakimiyyəti bir neçə gün bundan əvvəl Prezident İlham Əliyevin sərəncamı ilə Ağsu Rayon İcra Hakimiyyətinin başçısı təyin olunmuş Vahid Heydər oğlu Tağıyevlə bağlı avtobioqrafik məlumatları öz saytında yerləşdirib.

Axar.az xəbər verir ki, saytın yazdığına görə, Vahid Tağıyev 1961-ci ildə Göyçay rayonunun Alpoud kəndində anadan olub. O, 1983-cü ildə Azərbaycan Kənd Təsərrüfatı İnstitutunu mühəndis mexanik ixtisası üzrə bitirib. Həmin ildən Avtomobil Təmiri Zavodunda iş fəaliyyətinə başlayıb, çilingər vəzifəsindən zavodun Texniki Nəzarət şöbəsinin rəisi vəzifəsinədək yüksəlib.

1984-1987-ci illərdə Göyçay rayonu “Leninqrad” südçülük sovxozunda azad komsomol komitə katibi, 1987-2016-ci illərdə təhlükəsizlik orqanlarında işləyib.

2006-cı ildə “Hərbi xidmətə görə medal”ı ilə təltif edilib. 2018-2019-cu illərdə Yeni Həyat Şirkətlər Qrupu MMC-nin Daxili Təhlükəsizlik Departamentinin direktoru, 2019-cu ilin fevralından sentyabrınadək Azərenerji ASC-nin Nəzarət idarəsində rəis müavini vəzifəsində çalışıb.

30 sentyabr 2019-cu ildə Azərbaycan Respublikası Prezidentinin Sərəncamı ilə Ağsu rayon İcra Hakimiyyətinin başçısı təyin edilib.

Qeyd edək ki, V.Tağıyevin Dövlət Təhlükəsizlik Xidmətinin Astara və Zaqatala şöbələrində rəis müavini vəzifəsini daşıdığı bildirilir. Polkovnik V.Tağıyevin xüsusi xidmət orqanında son iş yeri DTX-nın Xaçmaz rayon şöbəsinin rəisi vəzifəsi olub.