"O kimdir ki, onun adamları bu məsciddə ağalıq etsin?"

Bu sözləri Axar.az-a açıqlamasında Aşurbəy məscidində (Ləzgi məscidi) fəaliyyət göstərən "Samur dindarları" dini icmasının sədri Hacı Faiq Mustafa son günlərdə məscid haqda yayılan xəbərlərə münasibət bildirərkən dedi. Onun sözlərinə görə, yayılan məlumatlar əsassızdır:

"Mən mətbuatda yayılan məlumatla tanış olmuşam. Bildirmək istəyirəm ki, bizim dini icma bu məlumatdan həddindən artıq narahatdır. Veysəl Orucov adlı şəxsin adını ilk dəfə mətbuatdan eşitmişəm. Belə bir adam tanımırıq. O kimdir ki, onun adamları bu məsciddə ağalıq etsin?"

İcma sədrinin sözlərinə görə, bəzi qüvvələr məscidi bağlatdırmaq istəyir:

"Bəzi qüvvələrin məscidi bağlatdırmaq fikri var. Mən onları tanıyıram. Buradan nə Suriyaya, nə də terrorçulara dəstək olmaq üçün adam göndərilir".

Xatırladaq ki, bir neçə gün öncə redaksiyamıza ünvanlanan məktubda V.Orucovun Azərbaycandan Misir, Qətər və digər ərəb ölkələrinə gizli şəkildə tələbələr göndərdiyi qeyd olunmuşdu.