Son zamanlar toylarda yemək və salatlardan zəhərlənmələrlə bağlı tez-tez məlumatlar yayılır. Bunun əsas səbəbinin bir toydan qalan yemək və salatların növbəti gün başqa toyda iştirak edən insanlara təklif edilməsi, ərzaqların keyfiyyətsiz, hətta istifadəyə yararsız, vaxtı keçmiş olması bildirilir. Hətta şadlıq saraylarında işləyən şəxslər də belə ciddi nöqsanlara yol verildiyini etiraf edirlər.

Məsələ ilə bağlı Axar.az-a danışan Azad İstehlakçılar Birliyinin sədri Eyyub Hüseynov bildirib ki, bunun əsas səbəbi sözügedən sahədə tənzimləmə olmamasıdır:

“Salatların yararılılıq müddəti bir neçə saatdır. Bəzi hallarda salatları, yeməkləri bir sutkadan çox saxlayıb növbəti toyda verirlər. Bu da insanların səhhətində müəyyən problemlər yaradır. Təəssüf ki, Azərbaycanda “İstehlakçıların hüquqlarının müdafiəsi haqqında” Qanun işləmir. Azərbaycan Qida Təhlükəsizliyi Agentliyi (AQTA) bu sahədə çox iş görməli, cəmiyyət bu sahədə onlara yardım etməlidir. Biz də AQTA-ya əlimizdən gələn dəstəyi göstərməyə hazırıq”.

E.Hüseynov mövcud problemlə əlaqədar İqtisadiyyat naziri Mikayıl Cabbarova müraciət edəcəyini deyib:

“Bu yaxınlarda Neftçalada bir qohumum dedi ki, toyda istifadə ediləcək əti şadlıq evinə təqdim etsə də, götürməyiblər. Şadlıq evindən deyiblər ki, əvvəlcə AQTA-dan icazə sənədi almalıdır. O da ətdən nümunə apararaq AQTA-nın regional nümayəndəliyində yoxlatdırıb, rüsumunu ödədikdən sonra əti şadlıq evinə təqdim edib. Etiraf edək ki, bütün şadlıq evlərində vəziyyət belə deyil.

Ona görə də Mikayıl Cabbarova müraciət edəcəm. Sözügedən problemlərin həllini tapması üçün bu sahədə mükəmməl istehlakçı siyasəti formalaşmalıdır”.