Ana səhifə Toplum |
Fövqəladə Hallar Nazirliyinin (FHN) Beynəlxalq axtarış-xilasetmə dəstəsi Türkiyə Daxili İşlər Nazirliyinin Fəlakət və Fövqəladə Hallar Departamentinin (AFAD) dəvəti ilə yanvarın 12-dən Ankarada keçirilən təlimdə iştirak edir.
Axar.az Fövqəladə Hallar Nazirliyinin mətbuat xidmətinə istinadən xəbər verir ki, təlimin əsas məqsədi Türkiyənin mentorluğu ilə humanitar əməliyyatlarda Azərbaycanı təmsil etmək üçün yaradılmış FHN-in Beynəlxalq axtarış-xilasetmə dəstəsinin BMT-nin Humanitar Məsələlərin Əlaqələndirilməsi Ofisinin (UN OCHA) Beynəlxalq Axtarış-xilasetmə Məşvərət Qrupunun (INSARAG) sinifləndirilməsindən keçməsi üçün hazırlığın artırılması, eyni zamanda, şəxsi heyətin humanitar əməliyyatlarda iştirakına dair bilik və bacarıqlarının təkmilləşdirilməsindən ibarətdir.
Yanvarın 13-də təlim çərçivəsində FHN-in Beynəlxalq axtarış-xilasetmə dəstəsinin üzvləri AFAD-ın inzibati binasında olublar.
Türkiyənin Daxili İşlər naziri Süleyman Soylu Azərbaycan FHN-in Beynəlxalq axtarış-xilasetmə dəstəsinin üzvləri ilə görüşüb. Nazir təlimdə iştirak edən Azərbaycan nümayəndə heyətinin üzvlərini salamlayaraq onlara uğurlar arzulayıb.
Sonra nazirliyin Beynəlxalq axtarış-xilasetmə dəstəsinin üzvləri AFAD-ın fəaliyyəti ilə yaxından tanış olublar. Qurumun Baş əməliyyat departamentinin rəisi Əbdülkadir Tezcan rəhbərlik etdiyi departamentin fəaliyyəti haqqında geniş məlumat verib. Həmçinin AFAD-ın fəaliyyəti haqqında təqdimatlar nümayiş etdirilib.
Sonra nümayəndə heyətinin rəhbəri polkovnik-leytenant Ələsgər Əliyev FHN-in fəaliyyət istiqamətləri haqqında ətraflı məlumat verib.
Daha sonra Türkiyə Respublikasının AFAD-ın Ankaradakı Təlim-Tədris Mərkəzində təlimin nəzəri hissəsi başlayıb. Yanvarın 18-dək davam edəcək təlim nəzəri və praktik hissələrdən ibarət olmaqla iki mərhələdə həyata keçiriləcək.
Tarix
2020.01.13 / 21:18
|
Müəllif
Axar.az
|