Bakının Badamdar qəsəbəsinin 3-cü massivində torpaq sürüşməsi prosesi sürətlənib.

Axar.az xəbər verir ki, bu barədə Baku TV-nin videomaterialında deyilir.

Belə ki, bir neçə gün əvvəl hasarlar arasındakı məsafə 15-20 santimetr olduğu halda, hazırda bu məsafə 2-3 metrə çatıb. Sürüşmə təhlükəsi səbəbindən sakinlərdən biri evini tərk etmək məcburiyyətində qalıb.

Ərazidəki bir neçə fərdi yaşayış evinin həyətində də oxşar vəziyyət müşahidə olunur. Sürüşmə zonasının aşağı hissəsində uşaq bağçası, digər yaşayış evləri və magistral yol yerləşir. Bu da ərazidə təhlükəsizliklə bağlı narahatlıqları artırır.

Qeyd edək ki, Badamdar qəsəbəsində torpaq sürüşməsi ilə bağlı 2018, 2019, 2021-ci illərdə, eləcə də 2026-cı ilin fevralında məlumatlar yayılıb.

Sakinlər ərazidəki torpaq qatının yumşaq süxurlardan ibarət olduğunu, yeraltı suların isə sürüşmə prosesinə təsir göstərə biləcəyini iddia edirlər. Onların sözlərinə görə, son günlər aidiyyəti qurumların nümayəndələri əraziyə baxış keçirib və müvafiq tapşırıqlar veriblər.