Ana səhifə Toplum |
...Həbsxanada bir Sahib Quliyev öldü, başqa bir Sahib Quliyev doğuldu.
Bu uşaq Lamiyənin dəfn edilmiş ümidlərinin nicatı oldu. Hər şey elə oktyabrda da tamamlana bilərdi - əgər yanvarın 17-də Axar.az hüquq müdafiəçisi Elçin Behbudova istinadən onun həbsdə üç aylıq övladı olduğunu yazmasaydı...
Bu tarixdən başlayan Lamiyə epopeyası düz bir ay üç gün çəkdi.
Fevralın 20-də Lamiyə atasının öldüyü, oğlunun doğulduğu
həbsxanadan çıxdı. İndi Axar.az-ın arxivinə nəzər salanda silsilə
yazılar, sensasion iddialar, tükürpədici faktlar, daban-dabana zidd
açıqlamaları görmək olar. Bu çaşqınlıq içərisində bütün suallar bir
ünvana yönəlmişdi - bu uşaq kimdəndir və hansı şəraitdə Lamiyə
hamilə qalıb? Hətta saxlandığı 4 saylı cəzaçəkmə müəssisəsinin
keçmiş rəisi Müzəffər Məmmədovun balaca Sahibin atası olduğu iddia
olunurdu.
E.Behbudovun Lamiyənin azadlığa çıxmasına verdiyi reaksiyası isə
indi maraq doğurur. Hüquq müdafiəçisi "Turan"a deyib ki, bu
hadisəni ictimailəşdirəndə zorakılıq faktı olub-olmadığını
araşdırmaq istəyirdi. Lakin təcavüz iddiasını Lamiyə təkzib elədi,
uşağın atası isə Elnur Rəsulov adlı dustaq çıxdı və o, kənara
çəkilməli oldu. Yalnız son ana qədər bu uşağın necə doğulması sirr
olaraq qaldı. Lamiyə Elnurla canlı görüşdüyünü, qarşı tərəf isə
toxumlarını ona göndərdiyini təkidlə deməkdə davam etdi. Yenə də bu
düyün çözülmədi ki, çözülmədi...
Dəyişməyən isə balaca Sahibin hesabına Lamiyənin azadlığa sahiblənməsi oldu. "Bundan sonra nə olacaq" sualı ritorik ola bilər. Çünki Lamiyə epopeyasının hələ ilk pərdəsi fevralın 20-də sona yetdi. Qarşıda keçmiş nişanlısı Vüqar Əliyevin işi və Şəmkirin sabiq başçısı Aslan Aslanovun qaranlıq gələcəyi dayanır...
Tarix
2015.02.20 / 23:54
|
Müəllif
Emin Aslanlı
|