Səhiyyə Nazirliyinin cəzalandırdığı özəl klinikalar lisenziya məsələsini aktuallaşdırıb. Axar.az xəbər verir ki, Azərbaycanda tibb müəssisələrinə verilən lisenziyanın ləğv olunması prosesinin daha da sadələşdirilməsi və dəqiqləşdirilməsi ilə bağlı qanun layihəsi hazırlanıb.

Qanunları pozan özəl tibb müəssisələrinin lisenziyalarının ləğv olunmasında müəyyən problemlər yaranır. Ona görə də bundan sonra onlara verilən lisenziyanın ləğv olunması prosesi sadələşdiriləcək.

Milli Məclisin Sosial siyasət komitəsinin sədri Hadı Rəcəbli də Trend-ə deyib ki, bəzi tibb müəssisələri onlara yaradılan şəraitdən sui-istifadə edərək qanunları ciddi şəkildə pozurlar:

"Yəni müəssisə hansı sahə üzrə lisenziya alıbsa, o sahə üzrə də fəaliyyət göstərməlidir. Bir də görürsən ki, stomatologiya üzrə lisenziya alıb, amma abortla məşğuldurlar".

H.Rəcəbli qeyd edib ki, eyni zamanda xaricdən Azərbaycana gələn həkimlərə də ciddi nəzarət olunur.

Xatırladaq ki, belə pozuntulara yol verdiklərinə görə "Bioloji Təbabət" MMC, İran İslam Respublikasının Qırmızı Aypara Cəmiyyətinin Azərbaycan Respublikasındakı nümayəndəliyi, "İdeal Tibb Şirkəti" MMC və "Diaqnoz Tibb Şirkəti" MMC şirkətləri barəsində mövcud qanunvericiliyə və İnzibati Xətalar Məcəlləsinin müvafıq maddəsinə uyğun olaraq cəza növü kimi inzibati-məcburedici tədbirlər görülüb.