Vəhşi heyvanların şəhərə, kəndə, yaşayış yelərinə girməsinin birinci səbəbi heyvanların yaşayış arealının daralmasıdır.

Bu sözləri Axar.az-a açıqlamasında ekoloq Telman Zeynalov Şəkinin mərkəzi küçələrini gəzintiyə çıxan ayıdan sonra bu dəfə rayonun Baş Layısqı kəndində axşam saatlarında ayıların görünməsi səbəbləri haqda danışarkən deyib.

O bildirib ki, brokanyerlər meşələrimizdə quş, dovşan və bu kimi heyvanları öldürdüyü üçün vəhşi heyvanların qidası azalıb:

“Heyvanlar özlərinə qida tapa bilməyəndə məcbur qalıb yaşayış yerlərinə girirlər. Vəhşi heyvanların yaşayış yerlərinə hücumunun yeganə səbəbi qida axtarışıdır”.

Ekoloq problemin qarşısını almaq üçün yol da göstərib:

“Nə qədər ki gec deyil, bunun qarşısını almaq mümkündür. Hər bir regionda Ekologiya və Təbii Sərvətlər Nazirliyinin bölmələri, qoruqları var. Bu gün bu nazirlik meşələrimizin qorunması üçün kifayət qədər iş görür. Təklif edərdim ki, nazirliyin regionlar üzrə bölmələri meşələrdə yem bazası yaratsın. Bu gün meşələrimizdə yem bazası yaradılsa, heyvanların yaşayış yerlərinə hücumu kəsilər. İnanmıram ki, qarnı tox, yemək tapmış heyvan yaşayış məntəqəsinə girsin. İnsanlar təbiətin qanunlarını pozmamalıdır. Meşəlik ərazilərdə evlər, villalar tikilir. Heyvanların yaşayış arealı daralır. Heyvanlar təbii olaraq qida tapmaq problemi də üzləşirlər. Meşələr heyvanlarındır. İnsan əgər vəhşi heyvanın onun yaşayış yerinə girməsini, qoyun-quzusuna hücum etməsini istəmirsə, təbiətin qanunlarını pozmamalıdır”.

Xatırladaq ki, ötən gün axşam saatlarında rayonun Baş Layısqı kəndində avtomobil yolunda ayılar görünüb. Kənd sakinlərindən biri, avtomobillə hərəkətdə olarkən təqribən 3-4 yaşlı qonur ayını müşahidə edib.

Mayın 31-də də Şəki şəhərinin mərkəzində qonur ayının hərəkət etdiyi müşahidə olunmuşdu.