Füzuli rayon Böyük Bəhmənli kənd sakinləri kənddə rabitə xəttinin olmamasından şikayət edirlər.

Axar.az xəbər verir ki, 8 min əhalisi olan kəndin sakinləri Nəqliyyat, Rabitə və Yüksək Texnologiyalar Nazirliyinə ATS qurulması üçün müraciət etdiklərini, lakin müsbət cavab almadıqlarını deyiblər.

Məsələ ilə bağlı Nəqliyyat Rabitə və Yüksək Texnologiyalar Nazirliyindən saytımızın sorğusuna cavab olaraq bildirilib ki, rayonda telekommunikasiya şəbəkəsinin rekonstruksiyası layihəsinin hazırlanması üzrə işlər aparılır:

“Füzuli rayonunun Böyük Bəhmənli kəndində telefon xidmətinə olan tələbatı təmin etmək üçün CDMA texnologiyasının əsasında simsiz rabitə şəbəkəsi qurulub və hazırda istismardadır. Aztelekom MMC-nin xidməti ərazisinə aid olan bütün regionlarda mərhələli şəkildə infrastruktur layihələri həyata keçirilir. Füzuli rayonunda da telekommunikasiya şəbəkəsinin rekonstruksiyası layihəsinin hazırlanması üzrə işlər aparılır”.