"Azərbaycanla Türkiyəni ayırmaq istəyən güclü qüvvələr var".

Report xəbər verir ki, bunu Qafqaz Müsəlmanları İdarəsinin sədri, şeyxülislam Allahşükür Paşazadə Türkiyənin Əziz Mahmud Hüdayi Vəqfinin fəxri başkanı Osman Nuri Toppaşın başçılıq etdiyi nümayəndə heyəti ilə görüşdə deyib.

QMİ-nin sədri qeyd edib ki, bu proses hələ SSRİ dönəmindən başlayıb: "Azərbaycan Sovet İttifaqının tərkibində olduğu zamanlarda Sovet hakimiyyəti bizim Türkiyə ilə olan münasibətlərimizi özü üçün böyük təhlükə hesab edirdi. Bu proses indi də davam edir. İndi də bir çox xarici qüvvələr Azərbaycanın Türkiyə ilə yaxın münasibət saxlamasını istəmirlər.

Bu gün ermənilər dünya ictimaiyyəti qarşısında yalançı göz yaşları axıdaraq uydurma "soyqırım"larını dünyaya təlqin etməyə çalışırlar, halbuki Azərbaycan torpaqlarında azərbaycanlıların başına gətirilən Xocalı soyqırımı, ermənilərin Azərbaycan torpaqlarını işğal etməsi və bu kimi vəziyyətlərdə Türkiyə həmişə Azərbaycan xalqının yanında olub".

A.Paşazadə bildirib ki, ermənilər əsrlər boyu türklərə qarşı soyqırımlar həyata keçiriblər: "Amma bu gün dünyaya yalandan çar çəkirlər ki, soyqırıma məruz qalmışıq. Həmişə olduğu kimi, indi də ermənilərin əməlləri ilə sözləri üst-üstə düşmür".