Milli Məclisin Mədəniyyət komitəsinin sədri Qənirə Paşayeva ötən həftə respublikamızda səfərdə olan türkiyəli həkimlərlə görüşüb.

Axar.az xəbər verir ki, Türk Ocaqlarının Baş katibi, prof.dr. Əmrah Şənəlin başçılıq etdiyi həkim heyətini Azərbaycanda salamlamaqdan məmnun olduğunu bildirən komitə sədri iki qardaş ölkənin hər zaman bir-birinin yanında olduğunu, gələcəkdə də belə olacağını deyib.

Qardaşlıq bağlarının möhkəmlənməsində aydınların müstəsna roluna vurğulayan Q.Paşayeva Türkiyə aydınlarının istər 44 günlük müharibə günlərində, istərsə də tarixi zəfəri qeyd etdiyimiz günlərdə Azərbaycana verdiyi əvəzsiz mənəvi dəstəyin unudulmayacağını bildirib.

Prof.dr. Ə.Şənəl də qardaşlığın önəmindən danışıb:

“Dünyanın harasında bir türk varsa, onun dərdi ilə dərdlənirik, əlimizdən gələn yardımı edirik. Yüz il öncə olduğu kimi, bugünlərdə də ölkəmizin bütün imkanları ilə işğalçı Ermənistana qarşı savaşan can Azərbaycanın yanında dik durduq, durmağa davam edəcəyik!”

Qardaş ölkənin nümayəndə heyətinin başçısı bildirib ki, Türkiyə Cümhuriyyəti dövlətinin təlimatı ilə Azərbaycanda yaralı əsgərlərə xidmət göstərmək üçün 30 nəfərlik xüsusi həkim briqadası göndərilib.

Q.Paşayeva bu mühüm dəstək üçün təşəkkür edib.