Ermənistanın Dilican şəhərindəki hərbi məktəbdə dronlar üzrə "Armath Airborne" mərkəzi yaradılıb.

Axar.az xəbər verir ki, bunu Azərbaycan İnternet Forumunun rəhbəri Osman Gündüz qeyd edib.

O bildirib ki, “Armath Airborne" Ermənistanın "Armath" mühəndis laboratoriyalarının inkişafı üzrə proqramın tərkib hissəsidir:

"15-18 yaşlı uşaqlar üçün nəzərdə tutulub. Onlar bu proqram çərçivəsində dronlar, onların hazırlanması və idarə edilməsi, dronların proqram təminatı üzrə nəzəri və praktiki bilik-bacarıqlar qazanacaqlar. Bu tip mərkəzlərin Ermənistanın 65 şəhərində və Xankəndidə açılmasını nəzərdə tutublar.

Erməni uşaqların bütün məktəblərdə, kütləvi olaraq kodlaşdırma üzrə elementar baza bilikləri və rəqəmsal bacarıqlar qazanması üçün də "Telekom Armenia" (Beeline) və digər qurumlar, diasporun dəstəyi ilə iş aparırlar.

Qeyd edim ki, ölkəmizdə dronların gətirilməsi və istifadəsi məhdudlaşdırılıb. 6 dövlət qurumu dron gətirilməsinə icazə verməlidir. Normal qaydalar hazırlanmayıb, NRYTN Dövlət Mülki Aviasiya Agentliyinin "Mülki pilotsuz uçan aparatların qeydiyyatı və uçuşlarına icazəyə dair müvəqqəti prosedur" mövcuddur. Bu sahəni liberallaşdırmaq, uşaqların və gənclərin bu sahə üzrə, ümumiyyətlə, rəqəmsal bilik və bacarıqlar qazanmaq üzrə imkanlarını genişləndirmək və kütləviləşdirmək doğru olardı".