Bizi etdiyimiz tənqidə görə heç kəs qınaya bilməz.

Bu sözləri ANS Şirkətlər Qrupu prezidentinin media üzrə müşaviri Mais Məmmədov ATV və ANS telekanalları arasındakı qalmaqal haqda Axar.az-a danışarkən deyib:

"Bizim hazırladığımız video-çarx reytinqə hesablanmayıb. Sadəcə, material hazırlamışıq, ATV telekanalı da bizim fikrimizlə razı olmayıb, vəssalam. Niyə axı ANS telekanalını reytinqə xidmət etməkdə ittiham edirlər? Biz gürcü patriarxının dediklərini də tənqid etmişik. Bizi etdiyimiz tənqidə görə heç kəs qınaya bilməz.

Materialda hər şey açıq-aydın göstərilib, deyilib. Bizim ATV ilə nə işimiz var axı? Onlar özləri bizim adımızdan istifadə edib reytinq qazanmaq istəyir. Tutalım ki, kimsə başqa birini tənqid edib, mən indi o adamı ittiham etməliyəm ki, siz reytinqə görə tənqid etmisiniz?"

Qeyd edək ki, ATV kanalının yeni mövsümlə əlaqədar qədim alban kilsəsində çəkdiyi video-çarxa gürcü patriarxı II İlya ilə yanaşı, ANS telekanalı da münasibətini açıqlayıb.

ANS gürcü patriarxını Azərbaycanın daxili işlərinə qarışmaqda və Gürcüstanda məscid təhqir edilərkən səsini çıxarmamaqda haqlı olaraq suçlayıb, eyni zamanda, ATV telekanalının hazırladığı süjeti də tənqid edib. ATV isə bunu həqarət kimi qarşılayaraq, bu addımı dırnaqarası həmkarlarının "iç üzünün görünməsi" kimi dəyərləndirib.

Hər iki süjeti müqayisə üçün təqdim edirik: