GAP mağazasından aldığım kəməri qaytara bilmirdim. Hüquqlarımı qorumaq üçün Sənaye və İqtisadiyyat Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinə zəng edib hadisə barədə məlumat verdim.

Axar.az-ın məlumatına görə, bunu Vaqif Abbasov adlı Feysbuk istifadəçisi yazıb.

Onun sözlərinə görə, şikayətini elə telefonda qeydə alıblar: "Qeydiyyatda olduğum ünvana məsələnin araşdırılacağı barədə məktub da ünvanlandı. Dövlət xidməti tərəfindən mənə zəng olunaraq araşdırma barədə məlumat verdilər.

"Retayl Qrup Azərbaycan"ın tərkibində olan mağazalar şəbəkəsinin işinə nəzarət edən əsas menecer Renat bəyə yönləndirdilər. Renat bəylə danışdıqdan sonra mağazaya yaxınlaşıb bir ay öncə 36 manata alınmış kəməri problemsiz olaraq geri qaytarıb nağd şəkildə pulu aldım".

V.Abbasov tövsiyə edib ki, mağazalarda və qəbzlərin üzərində "Məhsullar geri qaytarılmır" yazısını yığışdırsınlar: "Yaxşı deyil. Hüquqlarımızı qorumaq üçün hüquqşünas olmağa ehtiyac yoxdur".