Axar.az ekstrasens Elşən Məmmədovla magiya haqda söhbəti təqdim edir:

– Əvvəlcə magiyanın nə olduğu, necə və niyə istifadə olunduğu haqda danışaq.

– Bineyi-qədimdən indiyədək insanlar möcüzə axtarmağa meyilli olub. Göy guruldamağı, yağışın yağmağı, günəşin çıxmağı – hər şeydə bir möcüzə axtarıblar. İbtidai icma quruluşundan kapitalizm dövrünə qədər insanlar möcüzə axtara-axtara gəlib. İnsanların bir qismi magiyanın varlığını boş bir şey kimi qiymətləndirir. Bunu adətən dindarlar edir, onlar magiyanın mövcudluğuna inanmırlar. İslamdan 500 il əvvəl, xristianlıqda, hətta fironların dövründə belə magiya mövcud olub. Əbu Bəkr belə peyğəmbərə deyib ki, yəhudilər bizə gecə-gündüz cadu edir. Peyğəmbərin cavabı o olub ki, mənim müdafiəm namazımdır, bir də səmavi kitab olan Quranım. Bu, ona işarədir ki, bu kimi fitnə-fəsadlar var və şeytan tərəfdarları tərəfindən həyata keçirilir. Magiyadan istifadə edənlər ən çox şeytan tərəfdarlarıdır. Hər hansı bir məqsədə asan yolla çatmaq, ailə dağıtmaq, kiminsə ruzisini əlindən almaq və sair bu kimi formalarda özünü göstərən magiyadan zəif xarakterli insanlar istifadə edir.

– Magiyadan yalnız mənfi əməllər üçün istifadə olunur? Yoxsa magiyanın "yaxşı" növü də mövcuddur?

– Sağ-solun, böyük-kiçiyin, yaxşı-pisin olduğu kimi ağ və qara magiya mövcuddur. Magiyanı heç də hər zaman pis mənada başa düşmək lazım deyil. Amma ən yaxşısı Allahın qoyduğu qanunla gedib, magiyanın heç bir növündən istifadə etməməkdir. Təbii ki, yaşadığımız dövrdə magiyadan istifadə edən insanların sayı olduqca çoxdur.

– Yəqin ki, sizə də bu istiqamətdə müraciətlər olur. Bu məsələ ilə bağlı yanınıza çox adam gəlir?

– Heç bir kənar informasiyasız təkcə özümə müraciət edən yüzlərlə insan var. Kiməsə pislik etmək niyyəti ilə qara magiyadan istifadə etmək istəyirlər. Mənə müraciət edənlərin 90 faizi qadınlardır.

– Hansı problemlərinə görə magiyadan istifadə etmək istəyirlər?

– Onların bir hissəsi günülərinə, qayınarvadlarına, qayınanalarına qarşı qara magiyadan istifadə etmək istəyir. Onlara cadu, əməl edirlər. Hətta mənə kimdənsə qisas almaq üçün belə müraciət edirlər. Kişilər isə əsasən ruzilərinin bağlı olduğunu, yol bağlılığı olduğunu deyib müraciət edirlər və ağ magiyadan istifadə etmək istəyirlər. Bəzən mənə kimisə vurmaq və ya vəzifəsindən uzaqlaşdırmaq üçün də müraciət edirlər. Bunu bacaranlar hansısa məbləğdə pula aldanıb bu müraciətləri qəbul edir, kimlərinsə evini yıxır. Lakin bunu elə edirlər ki, heç kimin xəbəri olmasın. Pis iş, pis əməl görən insanlar bunu heç vaxt etiraf etmir.

– Daha çox hansı təbəqə magiyadan istifadə edir?

– Təəssüf ki, müasir günümüzdə bu silaha əl atmaq istəyənlər çoxdur. Rəsmi adamlardan tutmuş, bazar alverçilərinə qədər bu sahədə işlər görülür. Hətta bazarda iki piştaxta bir-birinə ruzisinə görə cadu edir. Bunun canlı şahidi özüm olmuşam. Bir alverçi digərindən şübhələnir ki, mənim niyə ruzim yoxdur, amma o, gecə-gündüz alver edir. Sizə çox maraqlı bir məlumat verim. Dünyanın bütün ölkələrində magiya ilə məşğul olan, ondan istifadə edən insanların 70 faizi hakimiyyətdə olanlardır. Bu sözü bilərəkdən deyirəm. Tanıdıqlarım, bildiklərim var. Postda olan və maqlara şarlatan deyən insanların özü gizli surətdə magiyadan istifadə edir. Bütün problemlərini magiya ilə həll edir, proqnozlar alır, onlara mane olanları aradan qaldırmağa çalışır. Pul onlar üçün maraqsız olduğuna görə nə qədər pul tələb olunursa, o qədər də verirlər.

– Qara magiyadan istifadə edən kəslər hansısa zərərlərlə üzləşirmi?

– Qara magiyayla məşğul olan insanlar həm bu dünyasını itirir, həm o dünyasını. Bu cümləni altından xətt çəkərək vurğulayıram: həm yaşadıqları bu dünyanı, həm də o biri dünyalarını itirirlər. Başqasına edilən qara magiya ikibaşlı olur və insanın özünə də mənfi təsir göstərir.

– Qara magiyada ən çox hansı elementlərdən istifadə olunur?

– Daha çox insan saçı və dırnaqlarından istifadə olunur. Kəsilmiş dırnaq və saç insanın tərindən, mikrobdan yaranmış bir şey olduğu üçün onlardan istifadə güclü effekt verir. Qara pişikdən də çox istifadə olunur. Hətta insanlar var ki, qırxı çıxmış meyitlərin əzalarından istifadə edirlər. Bütün bu sadaladıqlarım konkret olaraq qara magiya, pis niyyət üçün istifadə olunur.

– Belə fikir var ki, magiyanın insana təsiri ona inanıb-inanmamağından asılıdır. Yəni bir insan magiyaya inanmırsa, onda ona qara magiyayla heç bir təsir göstərmək olmaz, inanırsa, əksinə... Bu fikir nə dərəcədə düzgündür?

– Yaxşı sualdır. Ümumiyyətlə, qələmi əlinə götürüb pis əməl görən insana maraqlı deyil ki, zərər vuracağı şəxs ona inanır, yoxsa yox. Əgər əməli edənin qələminin gücü varsa, onu edəcək. İnanıb-inanmamaq boş şeydir.

– Magiyanın gücü millətə, dinə görə dəyişir? Hansı dində magiya daha güclüdür?

– Qara magiyada mövcud olan pis əməl və caduların ən güclü forması yəhudilərdədir. Ondan sonra ikinci yeri xristianlıq, üçüncü yeri isə islam tutur. Köməklik işində isə ən birinci yeri Quran ayələri tutur. İkinci yer yenə xristianlar, üçüncü yerdə isə yəhudilər. Maraqlı sıralamadır.

– Qara magiyaya qarşı müdafiə xarakterli hansısa addım atmaq olar?

– İbadət və Quran oxumaq. Namaz qılan bəndənin evinin ətrafına 40 ev - sağ, sol, ön, arxa tərəfdən - heç bir cadu təsir edə bilmir. Əgər həqiqi ibadət adamıdırsa, əlində Quran varsa, ona təsir etmək mümkün deyil. Xristianlar isə müdafiə olunmaq üçün şam və xaçdan istifadə edir.