Azərbaycanda qeydiyyatı rəsmiləşən və rəsmiləşməyən dini icmalar var. Onların siyahısında qeyri-müsəlman dini icmaları da yer alıb. Amma bir sıra dini icmalar var ki, onlar qeydiyyatsız olaraq hələ də fəaliyyətini davam etdirirlər. Belələrinin sırasında Yehova şahidləri və başqa dini təriqətlərin adlarını qeyd etmək olar.

Axar.az Dini Qurumlarla İş üzrə Dövlət Komitəsinə istinadla qeydiyyatda olan qeyri-müsəlman dini icmaların siyahısını hazırlayıb.

Siyahıda ilk sırada Rus Pravoslav Kilsəsinin Bakı və Azərbaycan Yeparxiyası tutur. Həmçinin Bakı şəhəri Dağ Yəhudiləri, Bakı Krişna Şüuru, Yeni Həyat Xristian, Azərbaycan Yəhudiləri, Molokan Ruhani-xristian dini icmaları fəaliyyət göstərir.

Sumqayıt Yəhudiləri dini icması, Qırmızı qəsəbə Dağ Yəhudiləri dini icması, Alban-Udi Xristian dini icması, Avropa Yəhudilərinin Bakı dini icması, Gürcü Yəhudilərinin Bakı dini icması da qeydiyyatdan keçib.

Qobustan rayonunda Molokan Ruhani-xristian dini icması, Bakıda Bəhai dini icması, Qaxda Müqəddəs Giorgi kilsəsi gürcü pravoslav xristian dini icması, Müqəddəs Nino kilsəsi gürcü pravoslav xristian dini icması da komitənin siyahısında yer alıb.

Xilaskar Yevangelik Lüteranların Bakı dini icması, Sumqayıtda Bəhai dini icması, Oğuzda Alban-Udi Xristian dini icmasının da qeydiyyatı var.

Adı mediada hallanan və icma kimi təqdim edilən bir çox dini birliklər isə Komitənin qeydiyyatından keçməyib və qeyri-rəsmi fəaliyyət göstərir.