İşgəncələrə Qarşı Azərbaycan Komitəsinin sədri Elçin Behbudov vəfat edib.

Bu barədə APA-ya komitədən bildirilib.

Məlumata görə, tanınmış hüquq-müdafiəçisi iki gün əvvəl səhhətinin pisləşməsi ilə əlaqədar xəstəxanaya yerləşdirilib. Şəkərli diabet xəstəliyindən əziyyət çəkən E. Behbudov gecə saat 01.00 radələrində dünyasını dəyişib.

Mərhum bu gün Yasamal qəbirstanlığında dəfn olunacaq.

Qeyd edək ki, Elçin Behbudov 1960-cı il fevralın 23-də Bakıda anadan olub. 1981-1995-ci illərdə hüquq mühafizə və xüsusi xidmət orqanlarında çalışıb.

1996-2001-ci illər Səhiyyə Nazirliyinin 1 saylı Respublika Ruhi-əsəb Xəstəxanasının baş həkiminin kadrlar üzrə müavini, baş hüquq məsləhətçisi vəzifəsində işləyib.

2002-ci ildən Milli Təhlükəsizlik Nazirliyinin təqaüdçüsüdür. 2012-ci ildən İşgəncələrə Qarşı Azərbaycan Komitəsinin sədri vəzifəsində işləyib. Həbsxana və Saxlanma Yerləri üzrə beynəlxalq ekspert olub.