"Azəristiliktəchizat" istənilən hava şəraitinə hazırdır.

Bunu Axar.az-a bu qışın son illərin ən sərt qışı olacağına dair verilən beynəlxalq proqnoza münasibət bildirən Azəristiliktəchizat ASC-nin mətbuat xidmətinin rəhbəri Rafiq Əliyev söyləyib. R.Əliyev bildirib ki, yaşayış binalarına verilən istiliyin dərəcəsi havanın temperaturundan asılı olaraq tənzimlənir:

"Qurum tərəfindən temperatur qrafiki müəyyənləşib. Çöldə neçə dərəcə temperatur olarsa, evlərə də buna müvafiq olaraq istilik verilir. Həmçinin qazanxananın böyük və kiçikliyindən asılı olaraq, iri rayon və məhəlli qazanxanaları fəaliyyət göstərir.

İri rayon qazanxanaları vasitəsilə 200-dək yaşayış binası və ətrafında yerləşən bağça, məktəb və poliklinikalar qızdırılır. Məhəlli qazanxanalardan isə 10-15 yaşayış binası və ətrafında yerləşən az sayda inzibatı binaların qızdırılması üçün istifadə olunur. Konkret limit yoxdur".

Yeni yaşayış binalarının istiliklə təmin olunmasına gəlincə, qurum rəsmisi bildirib ki, bunun üçün Mənzil Tikinti Kooperativləri texniki şərtlər almalıdırlar:

"Çünki istilik sistemləri layihələndiriləndə yeni yaşayış binaları mövcud deyildi. Ona görə də texniki şərtləri nəzərdən keçirilərək qazanxanalarda ehtiyat güc olduğu halda MTK-lar istiliklə təmin edilə bilər. Əks halda MTK-lar yeni fərdi qazanxanalar tikərək nasoslar quraşdırmalıdırlar".