Bir sıra internet portallarında İntizar İsmayılın İTV-dən işdən çıxarıldığı və bunun AzTV rəhbərliyinin qərarıyla olduğu haqda məlumat yayılıb.

Axar.az xəbər verir ki, bu barədə İctimai Televiziyanın ictimaiyyətlə əlaqələr şöbəsi açıqlama yayıb.

Kanal İntizar İsmayılın işdən çıxarılmasının AzTV rəhbərliyi ilə heç bir əlaqəsi olmadığını bildirib:

"İntizar Dinlərlə (İsmayıl) bağlanmış əmək müqaviləsinin müddəti başa çatdığından onun fəaliyyətinə xitam verilib. Həmçinin nəzərinizə çatdırırıq ki, İTV-nin rəhbərliyi qərarları kənardan heç bir müdaxilə olmadan, müstəqil şəkildə qəbul edir və verilən qərarların AzTV rəhbərliyinə heç bir aidiyyəti yoxdur".

Qeyd edək ki, İTV-də böyük redaktor vəzifəsində çalışan İntizar İsmayıl ata Məmməd İsmayılın AzTV sədri Arif Alışanovu tənqid etdiyi üçün işdən çıxarıldığını açıqlayıb.

1992-1993-cü illərdə AzTV-nin sədri vəzifəsində çalışan Məmməd İsmayıl Arif Alışanovu nəzərdə tutaraq bildirib ki, mühasibdən televiziya rəhbəri olmaz.