İctimai Televiziyanın (İTV) sözçüsü Akif Cabbarlı regional bürolarının bağlanması ilə bağlı yayılan məlumatları təkzib edib.

İTV rəsmisi A.Cabbarlı Publika.az-a bildirib ki, yayılan məlumatlar doğru deyil: "Regional bürolarımız bağlanmır. Bu, yalan söhbətdir. Bölgə müxbirləri Bakıya mütəmadi olaraq çağırılırlar, onlara müvafiq təlimatlar verilir və onlara verilən avadanlıqlar yoxlanılır və sairə. Regional büroların bağlanılmasından heç bir söhbət gedə bilməz".

A.Cabbarlı İTV-də ixtisarların olmayacağını bildirib.

Xatırladaq ki, Gün.Az saytı məlumatlı mənbəyə istinadən İctimai Televiziyanın regional bürolarının bağlanması ehtimalı ilə bağlı xəbər yayıb: "Artıq iki həftədən çoxdur ki, bölgə xəbərlərini yayan "Carçı region" efirə verilmir. Yutub kanalında son veriliş fevralın 12-də yerləşdirilib.

Eyni zamanda, fevralın 13-də regional büroların əməkdaşlarının avadanlıqları texniki baxış adı ilə yığılıb, bu günə kimi qaytarılmayıb".