Azərbaycan Standartlaşdırma İnstitutunun (AZSTAND) “AZSTANDART Halal” sertifikatlaşdırma orqanı halal sertifikatlaşdırma prosesini uğurla tamamlayan 5 müəssisəyə “Halal” uyğunluq sertifikatları təqdim edib.

Axar.az AZSTAND-a istinadən xəbər verir ki, bunlar - paxlava və dondurulmuş künəfə istehsalı üzrə “Köz Künefe 1977-den Hulusi usta” MMC, kolbasa istehsalı üzrə “M&T” LTD və “Zəhmət Ruzi” MMC, süd və süd məhsullarının istehsalı üzrə “Atena” MMC, eləcə də quş əti istehsalı və emalı sahəsində fəaliyyət göstərən “Murad Aqro” MMC-dir.

“AZSTANDART Halal” sertifikatlaşdırma orqanını Türkiyə Halal Akkreditasiya Qurumu (HAK) və Azərbaycan Akkreditasiya Mərkəzi (AzAK) akkreditasiya edib. Akkreditasiya İslam Ölkələrinin Standartlar və Metrologiya İnstitutunun (SMIIC) OIC/SMIIC 2:2019 standartı əsasında həyata keçirilib.

“Halal” uyğunluq sertifikatı əldə etmək istəyən sahibkarlar İnstitutun rəsmi internet səhifəsində yerləşdirilmiş https://azstand.gov.az/az/halal-sertifikat-ucun-muraciet linkinə daxil olaraq müraciət formasını tamamlayıb [email protected] elektron ünvanına göndərə bilərlər. Daxil olan müraciət “OIC SMIIC -1:2019 Halal qidaya dair ümumi tələblər” standartı əsasında yoxlanıldıqdan sonra sahibkara aidiyyəti üzrə xidmət göstərilir. Standartın tələbinə uyğun olaraq yoxlama prosesində texniki ekspertlərlə yanaşı, İslam dini məsələləri üzrə mütəxəssis də iştirak edir.

Yekun olaraq orqanın tərkibində yaradılmış Qərarvermə Komissiyasının müvafiq qərarına əsasən beynəlxalq səviyyədə tanınan “Halal” uyğunluq sertifikatı təqdim olunur. Sertifikatın keçərlilik müddəti 3 ildir.