Daha öncə tələbələrə vəd etdiyi təqaüdləri ödəmədiyi üçün gündəmə gələn “AQA Şirkətlər Qrupu” ilə bağlı problem öz həllini tapıb.

Axar.az xəbər verir ki, bu barədə “Azərbaycan Universitetləri” adlı sosial media səhifəsi məlumat yayıb.

Paylaşımda qeyd olunub ki, “Dəmir Ay” təqaüd proqramı üzrə qalib olmuş bütün tələbələrə təqaüdlər ödənilib.

Qeyd edək ki, “AQA Şirkətlər Qrupu” ötən il tələbələr arasında keçirdiyi “Dəmir Ay” adlı təqaüd proqramı çərçivəsində qaliblərə hər ay 250 AZN təqaüd veriləcəyini vəd etmişdi. Lakin uzun müddət keçməsinə baxmayaraq, şirkət bu ödənişləri yerinə yetirməmiş, yalnız bir aylıq təqaüd ödənilmişdi.

Tələbələrin dəfələrlə narazılıq bildirməsinə baxmayaraq, şirkət bu vaxta qədər məsələ ilə bağlı heç bir cavab verməmişdi. Nəhayət, ictimai reaksiyadan sonra problem aradan qaldırılıb.