Azərbaycanda ağır cinayətlərin törədilməsi barədə bilə-bilə yalan məlumat verməkdə ittiham olunan Şəmkir rayon sakini, 1990-cı il təvəllüdlü Ulfan Əliyevin məhkəməsi başa çatıb.

Axar.az Teleqraf-a istinadən xəbər verir ki, U.Əliyev insanların həlak olmasına, əhəmiyyətli əmlak ziyanının vurulmasına və digər ictimai təhlükəli nəticələrin baş verməsinə səbəb ola biləcək partlayış, yanğın və başqa hərəkətlərin hazırlanması barədə bilə-bilə yalan məlumat verməkdə ittiham olunub.

O, Bakının Xudu Məmmədov küçəsində olduğu zaman istifadə etdiyi özünə məxsus mobil nömrədən Daxili İşlər Nazirliyinin 102 qaynar xəttinə zəng edərək İsrail səfirini yandıracağını, oranı darmadağın edəcəyini, polis idarəsinə bomba qoyaraq partladacığını deyib.

Təqsirləndirilən şəxs həmçinin 20 metr məsafədə dayanıb, lopa ataraq İsrailin Bakıdakı səfirliyini yandıracağını, oraları da darmadağın edəcəyini, özünə isə od vuracağını bildirib.

İstintaq orqanı tərəfindən U.Əliyevin barəsində Cinayət Məcəlləsinin 216-cı (terrorçuluq barədə bilə-bilə yalan məlumat vermə) maddəsi ilə ittiham elan edilib.

Cinayət işi üzrə ifadə verən müttəhim ona elan olunmuş ittiham üzrə özünü təqsirli bilməyib. İfadəsində göstərib ki, Daxili İşlər Nazirliyinin 102 qaynar xəttinə zəng vurub, özünü yandıracağını söyləyib: “Mən özümü yandıracağım barədə məlumat vermişəm. Hər hansı bir yeri partlatmaq barədə söz deməmişəm”.

Bu cinayət işinə Bakı Ağır Cinayətlər Məhkəməsində baxılıb.

Hakim Elnur Nuriyevin sədrliyi ilə keçirilən prosesdə təqsirləndirilən şəxsə hökm oxunub. O, 5 il müddətinə azadlıqdan məhrum edilib.

Cəzanın ümumi rejimli cəzaçəkmə müəssisəsində çəkilməsi müəyyən olunub.