"Yardımlı Rayon Polis Şöbəsi və Baş Mütəşəkkil Cinayətkarlıqla Mübarizə İdarəsi əməkdaşlarının birgə keçirdikləri əməliyyat-axtarış tədbirləri nəticəsində ölkəmizə qaçaqmalçılıq yolu ilə aksiz markası olmayan siqaretlər gətirən dəstə ifşa olunub".

Bu sözləri Axar.az-a Daxili İşlər Nazirliyinin mətbuat xidmətinin rəis müavini Ehsan Zahidov Yardımlı rayonunda narkotik ticarəti ilə məşğul olan dəstənin həbs edilməsi xəbərinə aydınlıq gətirərkən bildirdi.

E.Zahidov qeyd etdi ki, hüquq-mühafizə, o cümlədən daxili işlər orqanları, ölkə üzrə baş verə biləcək ümumən cinayətkarlığa və narkotiklərin qanunsuz dövriyyəsinə qarşı fasiləsiz olaraq mübarizə aparırlar: "Bu il iyulun 16-da Yardımlı Rayon Polis Şöbəsinin və Baş Mütəşəkkil Cinayətkarlıqla Mübarizə İdarəsinin əməkdaşlarının birgə keçirdiyi əməliyyat tədbirləri nəticəsində ölkəyə qaçaqmalçılıq yolu ilə aksiz markası olmayan siqaretlər gətirən dəstə ifşa olunub. Bu dəstədən külli miqdarda aksiz markası olmayan tütün məmulatı götürülüb. Bununla əlaqədar hazırda 5 nəfər məsuliyyətə cəlb olunub və cinayət işi qaldırılıb. Hazırda istintaq aparılır".

E.Zahidov polkovnik-leytenant Vidadi Əhədovun polis sıralarından qovulması məsələsinə də aydınlıq gətirdi: "Polkovnik-leytenant Vidadi Əhədov daxili işlər orqanlarından qovulmayıb. Rəis müavini V.Əhədov cənab nazirin əmri ilə xidməti fəaliyyətində yol verdiyi nöqsanlara görə vəzifəsindən kənarlaşdırılıb və Daxili İşlər Nazirliyinin sərəncamına verilib".

E.Zahidov Şamil Seyidlinin Yardımlı rayonunun polis rəisi olduğu vaxt hazırda narkobaron kimi adı keçən Sərvər Əmirovun evində qalması və ikincinin bu faktdan sui-istifadə etməsi barədə məlumatları isə təkzib etdi.

Yardımlı polisi ilə Mütəşəkkil Cinayətkarlıqla Mübarizə Baş İdarəsinin birgə keçirdiyi əməliyyat, naroticarətçilərin həbsi, bir neçə polis əməkdaşının istintaqa cəlb edilməsi və polis sıralarından qovulması barədə yayılan məlumatlarla ətraflı BURADA tanış ola bilərsiniz.