Dövlət poliklinikalarında nikah öncəsi tibbi analizlər üçün vətəndaşlardan pul tələb edilir.

Bununla bağlı Axar.az-a toy öncəsi tibbi müayinədən keçən gənclərdən biri (adının hallanmasını məlum səbəbdən istəmədi – red.) məlumat verib. Belə ki, ötən ilin may ayında yeni binası istifadəyə verilən Yasamal rayonundakı 39 saylı şəhər poliklinikasında tibbi müayinəyə gedən gənclərdən cavablar üçün pul tələb edilir.

Üç həftədən çoxdur verdiyi analizlərin cavabını ala bilməyən şikayətçi qeyd edib ki, ondan 50 manat rüşvət istəyirlər:

"Poliklinikanın Leyla adlı tibb bacısı cavabların gec hazır olacağını bildirdi. Üstündən artıq 3 həftə keçdiyini dedim. Bildirdi ki, əgər cavabları tez almaq istəyirəmsə, 50 manat pul verməliyəm. Nikah öncəsi tibbi müayinənin pulsuz olduğunu bildirdim, ancaq tibb bacısı dedi ki, ya 50 manat ver cavabları verək, ya da get gözlə, nə vaxt hazır olar, onda gəlib apararsan. Maraqlıdı ki, gec hazır olan analiz cavabları mən 50 manat ödəniş edəndən sonra necə tez hazır olur?"

Məsələ ilə əlaqədar Axar.az-a açıqlama verən Səhiyyə Nazirliyinin mətbuat xidmətinin rəhbəri Liya Bayramova bildirib ki, nikah öncəsi alınan tibbi analizlər tamamilə pulsuzdur:

"Bunun üçün heç bir ödəniş tələb edilmir. Kimdən pul tələb edirlərsə, verməsin və haqqını tələb etsin".

Xatırladaq ki, yeni qanunla nikaha girənn gənclər tibbi müayinədən keçməli və onların sağlam olduqları təsdiqlənməlidir. Bu analizlərin pulsuz olmasına baxmayaraq, artıq bəzi həkimlər bundan yeni rüşvət vasitəsi kimi sui-istifadə edirlər.