BMT üzv dövlətləri üçün hazırlanan hesabatda Beynəlxalq Atom Enerjisi Agentliyi (MAQATE) Suriyada uran izlərinin aşkarlandığını bildirib.

Axar.az Musavat.com-a istinadən xəbər verir ki, radioaktiv maddənin qalıqları 2007-ci ildə İsrail Müdafiə Qüvvələrinin bombaladığı binada tapılıb.

O dövrdə hakimiyyətdə olan Bəşər Əsəd həmin binanın yerləşdiyi Deyr əz-Zor bölgəsindəki obyektin “adi hərbi baza” olduğunu iddia edirdi. Lakin MAQATE 2011-ci ildə gəldiyi nəticədə binanın “böyük ehtimalla gizli şəkildə inşa edilmiş, agentliyə bildirilməmiş nüvə reaktoru” olduğunu qeyd etmişdi.

Hesabatda bildirilir ki, götürülmüş nümunələrin birində “xeyli sayda təbii uran hissəcikləri” aşkar olunub. Analizlər göstərib ki, bu uran antropogen mənşəlidir, yəni kimyəvi emal nəticəsində əldə olunub. “Təbii” termini isə uranın zənginləşdirilmədiyini ifadə edir.