Bütün məsuliyyətimlə bəyan edirəm ki, ermənilər nəinki Cənubi Qafqaza, ümumiyyətlə, Asiya qitəsinə köçüb gəlmə əhalidir. Ermənilərin gəlmə olduğunu mənbələr və “tarixin atası” Herodot təsdiq edir. Nə Rusiya, nə də Avropa ölkələri ermənilərə “Böyük Ermənistan” dövləti yaratmayacaqlar. Bu, onlara sərf etmir. Amma çirkin niyyətlərini həyata keçirməkdən ötrü ermənilərdən istifadə edirlər.

Kult.az xəbər verir ki, bu sözləri AMEA-nın Tarix İnstitutunun direktoru, Milli Məclisin deputatı, akademik Yaqub Mahmudov Ankarada Xocalı soyqırımının 26-cı ildönümünə həsr olunmuş Beynəlxalq Xocalı Simpoziumunda çıxışı zamanı deyib.

Akademik beynəlxalq aləmin Xocalıya qiymət verməli olduğunu bildirib:

“Bu gün konfliktlərin hamısı türk-islam coğrafiyasında baş verir. Terrorun islamla əlaqələndirilməsinin əleyhinəyik. Azərbaycan və Türkiyənin terror təşkilatı yoxdur, amma ermənilərin yüzlərlə terror təşkilatı var. Terror təşkilatlarını böyük dövlətlər yaradır.

Ermənistan prezidenti Serj Sərkisyan britaniyalı jurnalist Tomas De Vaala müsahibəsində Xocalı soyqırımının təşkilatçılarından olduğunu özü də etiraf edib”.

Alimin sözlərinə görə, Qərbin Türkiyə və Azərbaycana qarşı məkrli planı var:

“Qərbin bəzi dairələri bizi eşitmək, görmək və dediklərimizi qanmaq istəmir. Bu gün Azərbaycanı və Türkiyəni içəridən qarışdırmaq üçün planlar var. Tarixinə sahib çıxan xalq məğlubedilməzdir. Tarixinə sahib çıxmayan xalq isə gec-tez başqalarına yem olur. Bütün türk dünyasını qafalarda birləşdirmək lazımdır”.

Qeyd edək ki, simpozium çərçivəsində Yaqub Mahmudov “Xocalı şəhidləri xatirə ormanı”nın salınmasında və orada ilk ağacların əkilməsində iştirak edib. Tədbirdə həmçinin Xocalı soyqırımından bəhs edən “Cəzasız cinayət” adlı sənədli film də nümayiş etdirilib.