"Oyunlar ölkəmiz adına son illərin bəlkə də ən müsbət hadisəsidir".

Axar.az xəbər verir ki, bu barədə millət vəkili Fazil Mustafa I Avropa Oyunlarının açılış mərasimi ilə bağlı təəssüratlarını bölüşərkən yazıb:

"Avropa Oyunlarını stadiondan canlı izləmənin həzzini yaşadım. Möhtəşəm bir tədbir, möhtəşəm bir tərtibat var idi. Kompozisiya barədə bəlkə də daha yaxşısını düşünmək olardı. Ancaq kifayət qədər rəngarənglik vardı və xüsusilə də Qobustan qayaları kompozisiyası mükəmməl idi. Alim Qasımov, "Sarı gəlin", "Qarabağ şikəstəsi", hətta Ledi Qaqa belə tərtibatın içində tam uyğun görünürdü. Nizami əsərlərinin kompozisiyası əcnəbilər üçün bir qədər anlaşılmazdı, elə bizim üçün də müəyyən epizodlarda sual işarəsi yarandı. Kompozisiyada Şərqdə ilk cümhuriyyət yaradıldığını xatırlatmaq mədəni simamızın tanıtımı baxımından daha faydalı olardı. Nar simvolikası da uğurlu seçilmişdi və parçalanmış nardan nar dənəsini xatırladan şarların dağılımı gözəl düşünülmüşdü. Alov kompozisiyası da sonluq üçün çox uğurlu seçim idi".

O, Türkiyə və Azərbaycan heyətlərinin hardasa eyni coşqu ilə qarşılanmasından daha çox zövq aldığını bildirib:

"Düşmənə göz dağı vermək baxımından seyr etməyə dəyən tədbir hər şeydən əvvəl millətin səfərbər olma potensialını göstərdi. Təşkilatçılıqda, icrada zəhməti olan hər kəsə vətəndaş olaraq təşəkkür etməyi borc bilirəm. Ölkəmiz adına son illərin bəlkə də ən müsbət hadisəsi dəyə bilərəm. İnşallah, idmançılarımız da uğurlu çıxışlarla əhvalımızı daha da yüksəldərlər".