Rusiyada artıq dövlət səviyyəsində "Onlayn qiraət" deyilən bir layihə gerçəkləşib. Təyin olunan vaxtda oxucular hansısa məşhurun, rus klassikinin əsərini oxuyub, müzakirə edir. Sizcə, bu, bizdə niyə yoxdur və bunu hansı dövlət qurumu etməlidir: Mədəniyyət və Turizm Nazirliyi, AYB, yoxsa?..

Axar.az Baba Vəziroğlu və Aqşin Yeniseyin bu suala cavabını təqdim edir:

Baba Vəziroğlu:

"Bu gözəl, faydalı işin klassik variantının təməlini rəhmətlik Heydər Əliyev qoyub. Hələ sovet dövründə Ali Partiya nomenklaturasını hər həftə yarıxoş, yarızor toplayıb simfonik musiqi konsertlərinə aparardı. Yüksək çinli məmurların musiqi zövqünü də yüksəyə qaldırmaq üçün direktiv üsullardan yararlanmaq zorunda idi. Bu gün bir daha o qənaətə gəlirəm ki, beyinlər, təfəkkür təbiətən təlqin üçün münbit tarladır - yaxşılıq təlqin edərsən, insan mələk olar, pislik aşılayarsan, qatilə çevrilər. Bunun üçün də güc lazımdır. Bu gün və həmişə cəmiyyətdə iki güc var: din və dövlət. Dindən əlimizi üzək - daim cəhalət bələdçisi olub. Dövlət işə qarışanda isə nəticə həmişə uğurlu olur. Təəssüf ki, hələ dövlət millətə deməlidir ki, oxu, öyrən! İllah da ki, o millət müsəlman ola".

Aqşin Yenisey:

"Rusiya ədəbiyyat ölkəsidir, ona görə ədəbiyyat ölkəsidir ki, orada tarixən fəlsəfənin, elmin işini də ədəbiyyat görüb. Ona görə rusun ədəbiyyatdan gözlədikləri ilə bizim ədəbiyyatdan gözləntilərimiz arasında yerlə-göy qədər fərq var. Biz istəsək belə, rus ədəbi ənənələrini ölkəmizdə tətbiq edə bilmərik, gücümüz, potensialımız çatmaz, nə nazirlik, nə hər hansı ictimai qurum, nə də hər hansı yazıçı, şair səviyyəsində. Bu işlər bizlik deyil".