İngiltərənin "Faynənşl Tayms" qəzeti Türkiyə Prezidenti Rəcəb Tayyib Ərdoğanın suriyalı qaçqınlara vətəndaşlıq verilməsi ilə bağlı söylədiyi fikirləri şərh edib.

Axar.az xəbər verir ki, məqalədə prezidentin təklifinin nəinki ölkə daxilində ictimai fikri haçalaya, hətta Brüssellə Ankara arasında miqrant sazişinin icrasını mürəkkəbləşdirə biləcəyi qeyd olunub:

"Ərdoğan suriyalılara vətəndaşlıq verməklə qarşıdakı seçkilərdə hakim partiyanın elektoratını genişləndirmək istəyir. Onun bu çıxışı Türkiyə ilə Avropa Birliyi (AB) arasında miqrant axınına dair imzalanmış saziş üçün də çətin suallar yaradır. Məsələ burasındadır ki, AB Türkiyəyə miqrant axınının dayandırılması müqabilində ölkə vətəndaşlarının Avropaya vizasız gediş-gəlişi üçün icazə verməlidir. Ayrıca, Türkiyə ilə imzalanmış bu sazişin icrası üçün AB Ankaradan ölkənin yeni antiterror qanununun ləğv edilməsini tələb edib. Bu güzəşt edilmədən Türkiyəyə Şengen zonasına giriş verilməsi perspektivi suallar doğurur. İndi isə Ərdoğanın bu çıxışı AB liderlərinin ciddi narahatlığına səbəb olacaq. Çünki suriyalı adı ilə İŞİD üzvlərinin Avropaya girişi daha asan olacaq".

Xatırladaq ki, Ərdoğan Kilis vilayətində çıxışı zamanı ölkəyə pənah gətirən təxminən 3 milyona yaxın suriyalıya vətəndaşlıq təklif ediləcəyini deyib.

"Bu gecə mən qardaşlara və bacılara yaxşı bir xəbər vermək istəyirəm. İnanıram ki, qardaş və bacılarımızın arasında Türkiyənin vətənadaşı olmaq istəyənlər var. Türkiyə sizin evinizdir", - Ərdoğan qeyd edib.