Türkiyə Prezidenti Rəcəb Tayyib Ərdoğan “Türk soylu əcnəbilərin Türkiyədə peşə və sənətlərini sərbəst şəkildə icra edə bilmələri, dövlət və ya özəl müəssisələrdə çalışdırılmaları haqqında qanunun tətbiqi ilə bağlı Əsasnaməyə dəyişiklik edilməsi” barədə qərar imzalayıb.

Axar.az xəbər verir ki, bu barədə qərar “Rəsmi qazet”də dərc edilib.

Yeni qərarın tətbiqi ilə türk soylu icmalardan olan şəxslər Türkiyədə daha geniş hüquqlara malik olacaq.

Qərara əsasən ,türk soyluluğun müəyyənləşdirilməsi: Hər hansı bir şəxsin və ya icmanın “türk soylu” hesab olunması bundan sonra birbaşa prezident qərarı ilə müəyyən ediləcək.

Həmin Əsasnamənin 3-cü maddəsinə əsasən, türk əsilli əcnəbilərin Türkiyədə peşə və sənətlərini sərbəst şəkildə icra edə bilməsi üçün aşağıdakı şərtlərin hamısı təmin edilməlidir:

- Daxili İşlər Nazirliyi tərəfindən yaşayış icazəsi verilməlidir,

- Müəyyən peşə və sənət üçün qanunların tələb etdiyi xüsusiyyətlərə malik olduqlarını Türkiyənin aidiyyəti orqanlarından alınan sənədlərlə sübut etməlidirlər,

- Təhsil səviyyəsini göstərən xarici ölkədəki məktəblərdən verilmiş diplomların müvafiq qurumlar tərəfindən təsdiq edilmiş ekvivalentinə malik olmalıdırlar,

- Həmin peşə ilə məşğul olmaqda heç bir təhlükəsizlik problemi olmamalıdır,

- Əcnəbilər üçün açılacaq xüsusi registrlərdə əhalinin uçotunun aparıldığını sənədləşdirmək.

- Xarici ölkələrdən alınmış peşə üzrə mütəxəssis sertifikatlara malik olmaları müvafiq qurumlar tərəfindən təsdiq olunmalıdır,

- Prezidentin fərmanı ilə müəyyən edilən türk soylu icmadan olmalıdır,

- Vətəndaşı olduğu ölkədə asılı olmayan səbəblərdən peşə, sənət və ya işini icra edə bilmədiyinə görə Türkiyədə yaşamağa məcbur qalmalıdır.

- Vətəndaşı olduğu ölkənin əhalisinin böyük əksəriyyətindən fərqli etnik və mədəni kimliyə malik olmaq (Bu bəndin nəyi ifadə etdiyi anlaşılmır – red).

Həmin Əsasnamənin 20-ci maddəsinin birinci abzasındakı “Nazirlər Şurası tərəfindən” ifadəsi “Prezident tərəfindən” sözü ilə əvəz edilib.

Bu qərar dərc edildiyi gündən qüvvəyə minir.

Qeyd edək ki, bu dəyişikliklərdən sonra Azərbaycan, Qazaxıstan, Qırğızıstan, Türkmənistan, Özbəkistan, Şərqi Türküstan, Ahıska, Qaqauz, Krım kimi türksoylu icmalardan olan şəxslər Türkiyədə “əcnəbi” kimi deyil, öz vətənlərindəki kimi yaşamaq və işləmək imkanına sahib olacaqlar.