50-ci illərdə çıxan bir adı Lənkəranski kimi bir oğula tətbiq etmək fikrimcə, düzgün deyil.

Axar.az xəbər verir ki, bunu tanınmış hüquqşünas, sabiq polis işçisi, polkovnik Mahmud Hacıyev Rövşən Moderator.az-a geniş müsahibəsində Lənkəranskinin qətlinə münasibət bildirərkən deyib.

Onun sözlərinə görə, Lənkəranski sözün yaxşı mənasında lotu olub:

"Rövən Lənkəranskiyə "qanuni oğru" deməyə dilim gəlmir. Öncə bir şeyə diqqət çəkim ki, II Dünya müharibəsindən sonra iqtisadi baxımdan ağır vəziyyətə düşən, ayrı-ayrı oğru və qrupların fəaliyyətini əngəlləyə bilməyən SSRİ-də oğurluq geniş yayılmışdı. Mənzillər, banklar qarət edilirdi. Həmin ərəfədə Stalin hətta Cinayət Məcəlləsində profilaktik tədbir kimi maddələrin cəza hissəsinin çəkisini də artırdı. Məqsəd oğurluq, quldurluq, soyğunçuluq hallarının azalmasına nail olmaq idi. Həmin ərəfədə bir neçə dəfə yatıb çıxanlara, oğurluqla çox məşğul olanlara "qanuni oğru" adı qoydular. II Dünya müharibəsindən sonrakı dövrdə, 50-ci illərdə çıxan bir adı indiki şəraitdə kriminal aləmin bir avtoritetinə, Rövşən Lənkəranski kimi bir adama tətbiq etmək, fikrimcə, düzgün deyil.

İş ondadır ki, II Dünya müharibəsi sonrakı meydana çıxan bu adı yeni şərait və şərtlərə uyğun olaraq başqa ifadə ilə əvəz etmək kriminal aləmin yadına düşmür və yəqin ki, bu gündən sonra da bununla məşğul olmayacaqlar, bu proses davam edəcək. Lənkəranski sözün tam, yaxşı mənasında lotu idi. O, kriminal aləmdə sözü keçən hörmətli şəxs idi. Nə Rövşənin, nə də onun ətrafının heç bir quldurluqda, soyğunçuluqda, narkotik işində əlləri olub. Kiminsə mənzilini qarət etsinlər, kiminsə nəyinisə oğurlasınlar, hansısa narkotik alqı-satqısı təşkil etsinlər – belə bir şey olmayıb. Bu işlərlə məşğul olmayan şəxsə qanuni oğru demək, zənnimcə, düzgün deyil. Lənkəranski sözü keçən hörmətli bir lotu idi".

Sabiq polis rəisinin sözlərinə görə, Rövşən qürbətdə yaşayan həmyerlilərimizə hər zaman dayaq olub:

"Rövşən Ukrayna, Rusiya və Türkiyədə böyük nüfuz sahibi idi. O, bu nüfuzundən həm böyük bizneslə, həm pərakəndə alverlə məşğul olan, həm də bir qarın çörəyə işləyən azərbaycanlıların himayə edilməsində istifadə edirdi. Onun nüfuzu bu üç ölkədə yaşayıb işləyən soydaşlarımız üçün böyük bir çətir idi.

Bu ölkədə yaşayan azərbaycanlıların başına hər hansı bir hadisə gələn zaman onlar hüquq-mühafizə orqanlarına müraciət edəndə, çox vaxt, həmin hüquq-mühafizə orqanları gəlmə azərbaycanlıların problemini həll etmir, buna maraq göstərmirdi. Yaxud, Azərbaycanın bu dövlətlərdəki səfirliyinə, konsulluğuna müraciət edəndə hardasa bürokratiya, hardasa başdansovduluq bu problemin həllinə mane olurdu. Hətta bu problemin həllinə kimsə ürəkdən can yandırsa belə, məsələnin həlli üçün bir qədər zaman tələb olunurdu. Yəni həmin azərbaycanlıların hüquqlarının bərpası ciddi problemə çevrilirdi. Belə məsələləri azərbaycanlılar üçün Rövşən kimi oğullar həll edirdi. Onlar sözün həqiqi mənasında bu kimi problemləri 5 dəqiqəyə həll edirdi. Ona görə də onlar bu qədər böyük hörmət və nüfuz əldə edirdilər

Polkovnik Lənkəranskinin bir neçə dəfə həbs olunduğunu da xatırladıb. O, Rövşənin "oğru" maddələri ilə həbs yaşamadığını bildirib:

"Onun bir neçə dəfə yatıb çıxması heç vaxt soyğunçuluqla, oğurluqla, narkotiklə bağlı olmayıb. O, həmişə qeyrətli maddələrlə yatıb. Mən məsələyə bu nöqteyi-nəzərdən yanaşıram.

Bəzi millət vəkillərinin, siyasilərin ona hörmətlə yanaşmasına gəlincə, mən onları alqışlayıram. Onlar hardasa mənim sizə dediklərimi başa düşürlər, məsələyə oğurluq kontektsindən yanaşmırlar. Rövşənə azərbaycanlıların qeyrətini, təəsübünü, qayğısını çəkən bir oğlan kimi yanaşırlar. Sizə elementar bir misal çəkim. 15 il bundan öncə yaxın bir dostum mənə bir söhbət elədi. Bu, Rövşən kimi böyük nüfuza sahib olan Hikmət haqqındadır. Dostum deyir ki, o, Moskva aeroportundan Bakıya uçmaq ərəfəsində ayaqyoluna dəyir. Bu zaman rus kriminal aləminin iki iricüssəli şəxsi ayaqyolunda bunun cibindəki 7 min dollar məbləğindəki pulu götürür. O, nəhənc cüssəli iki rusa müqavimət göstərə bilməyib və pulu əlindən çıxıb. Dostum deyir ki, mən çox gərgin, sarsılmış halda çöldə məni gözləyən qohumumun yanına gəldim. O, nə baş verdiyini soruşub. Dostum isə başına gələnləri danışıb və sonra soruşub ki, hüquq-mühafizə orqanlarına müraciət edim? Qohumu isə bildirib ki, bunu güc orqanları həll edən deyil.

Dostum deyir ki, qohumum elə aeroportdan Hikmətin yaxın bir dostuna zəng etdi. Hikmətin dostu isə soruşdu ki, aeroportun hansı hissəsindəsiz? Harda oturmusunuzsa, orada da qalın, indi məsələ həll olunacaq.

Dostum deyir ki, heç 20 dəqiqə keçmədi ki, yoxa çıxan ruslar qəfildən peydə oldular və məndən aldıqları 7 min dollar pulu geri qaytardılar. Həmin pul Hikmətin hörmətinə, sözünə görə qayıtdı. Biz Rövşənə də, Hikmətə də bu kontekstdən yanaşmalıyıq. Mənim hər ikisinə polis zabiti, polkovnik, keçmiş polis işçisi kimi böyük simpatiyam var".