Rusiyanın İkinci Qərb Dairə Hərbi Məhkəməsi “Krokus Siti Holl”dakı terror hücumunun dörd iştirakçısını ömürlük həbs cəzasına məhkum edib.

Axar.az xəbər verir ki, bu barədə “İnterfaks” məlumat yayıb.

Məlumata görə, Dalercan Mirzəyev, Saidəkrəm Rəcəbəlizadə, Şəmsəddin Fariduni və Məhəmmədsabir Feyzova ömürlük həbs cəzası verilib. İş üzrə təqsirləndirilən şəxslər terror hücumu, terror fəaliyyətinə kömək, terror fəaliyyəti həyata keçirmək məqsədilə təlim keçmək və digər cinayətlərdə təqsirli biliniblər.

Məhkəmə həmçinin onların hər birinə 990 min rubl məbləğində cərimə tətbiq edib. Onlar cəzalarını xüsusi rejimli cəzaçəkmə müəssisəsində çəkəcəklər.

Bundan əlavə, məhkəmə terror hücumu işi üzrə daha 11 təqsirləndirilən şəxsə ömürlük həbs cəzası verib. Bunlar Umecan və Müstəqim Soliyevlər, Şahramcan Qadayev, Zubaydulla İsmayılov, Hüseyn Xamidov, Məhəmməd Şərifzadə, Yaqubcani Yusifzadə, Nazrimad Lutfullayi, Cumaxan Qurbanov, Husen Medov və Cəbrayıl Auşevdir.

Digər dörd təqsirləndirilən şəxs 19 il 11 aydan 22,5 ilə qədər həbs cəzasına məhkum edilib.

Qeyd edək ki, “Krokus Siti Holl”da terror aktı 22 mart 2024-cü ildə baş verib. Hadisə nəticəsində 150 nəfər həlak olub.