Rusiya Təhlükəsizlik Şurası sədrinin müavini, keçmiş prezident və keçmiş baş nazir Dmitri Medvedyev Ermənistanın Baş naziri Nikol Paşinyanın Ukrayna Prezidenti Vladimir Zelenski ilə İrəvandakı görüşünü “iki beyinsiz rusofob” ifadəsiylə şərh edib. Medvedyevin təhqirə keçməsinin səbəbi iki liderin danışıqları rus dilində deyil, ingilis dilində aparması olub. Medvedyev hər iki liderin ingilis dili səviyyəsini də məzxərəyə qoyub. Görünür, Rusiyanın dövlət kanalında siyasi proqramın aparcısı olan Vladimir Solovyov söyüş söyməkdə böyüklərindən nümunə götürüb.

Axar.az xəbər verir ki, bu sözləri politoloq Elxan Şahinoğlu bildirib.

“Kreml sahibi və onun ətrafı keçmiş SSRİ-nin tarixdə qaldığını qəbul etmək istəmir. Rusiya imperiyasının bərpası xülyasıyla yaşayanların “məntiqinə” görə, keçmiş SSRİ-yə aid dövlətlərin liderləri öz aralarında ancaq rus dilində danışmalıdırlar. Bunun özü imperiya təfəkkürünün tərənnümüdür. Liderlər arasında rus dilində danışan da, ingilis dilinə üstünlük verən də var. Ukrayna əraziləri Rusiyanın işğalı altındadır, müharibə tam şiddətiylə davam edir, Ukraynanın şəhər və qəsəbələri bombalanır, mülki insanlar həlak olur, belə olan halda Prezident Vladimir Zelenski niyə həmkarlarıyla işğalçının dilində danışmalıdır?” - politoloq əlavə edib.

Qeyd edək ki, Vladimir Zelenski Avropa Siyasi Birliyinin 8-ci sammitində iştirak etmək üçün 4 mayda İrəvana səfər etmişdi.