Xəbər verdiyimiz kimi, Bakı Metropoliteninin rəisi Vüsal Aslanovun Bakıxanov, Binəqədi, Yeni Yasamal ərazisinə metronun çəkiləcəyi halda orada yaşayan insanların şəhərin mərkəzinə axışacağı və sıxlıq yaradacağı haqda sözlərini sosial şəbəkələrdə də geniş müzakirələr və reaksiyalar doğurub.

Axar.az bu müzakirə və reaksiyalardan bəzilərini təqdim edir:

Vüsal Məmmədov (jurnalist):

Metropolitenin rəisi Vüsal Aslanov elə bilir ki, əgər metro stansiyası yoxdursa, deməli, Binəqədi, Bakıxanov, Qaraçuxur, Yeni Yasamal sakinləri şəhərin mərkəzinə gəlmirlər. Adam Bakını Lük Bessonun "13-cü kvartal" filmindəki kimi gettolara bölünmüş təsəvvür edir. Cənab rəis, metro oldu-olmadı, həmin insanlar onsuz da şəhərin mərkəzinə gəlirlər. Sadəcə, daha əziyyətlə: yaxın metro stansiyasına qədər avtobusla, "manatlıq taksi" ilə çatır, sonra metro ilə yollarına davam edirlər.

Asif Mərzili (jurnalist):

Biz hələ də yetişməmişik. İnsanların azadlığını, sərbəst yaşamaq, gəzmək... hüququnu gör necə məhdudlaşdırmaq istəyirlər... Ərəblər “Torqovı”ya metro ilə gəlirlər?

“Bizim Yol”:

“Bir məmur ölkə vətəndaşlarının sərbəst hərəkətindən niyə narahat olsun ki? Niyə Masazır sakini Bakının mərkəzinə gəlməsin? Xəstəlik yayırmı?

Nə yeyib, nə içirsiniz, Vüsal müəllim?

Qadir Həzi (jurnalist):

Mənim də cənab V.Asalanova balaca bir təklifim var. Cənab V.Aslanov, yaxşı olmazdımı, söylədiyiniz və söyləmədiyiniz Bakıətrafı əraziləri hasara alıb post qurasız? Buraxılış saatı tətbiq edərsiniz. Bununla da şəhərin mərkəzini kənarda yaşayanlardan qoruyar və məhdud infrastrukturdan rahatlıqla isifadə edə bilərsiniz.

Bu, sadəcə təklifdir, nəzərə almaya da bilərsiz.