Sabirabad rayonunda gənc qəfil vəfat edib.

Axar.az xəbər verir ki, rayon sakini, 1993-cü il təvəllüdlü Dəyanət Şıxəliyev qəflətən dünyasını dəyişib. Onun ürəktutmadan öldüyü bildirilir.

Qeyd edək ki, mərhum 2014-cü ildə böyük qəhrəmanlığı ilə yadda qalmışdı. Belə ki, 2014-cü ildə Sabirabad şəhərini Cavad kəndi ilə birləşdirən, yeni istifadəyə verilmiş körpüdən 1957-ci il təvəllüdlü, Cavad kənd sakini, Sabirabadın 5 saylı məktəbində müəllim işləyən Əhliman Hüseynov ona məxsus VAZ-2107 markalı maşınla Kür çayına düşmüşdü. Maşındakı qonşusunun qızı, 9 yaşlı Güldəstə Hüseynovanı xilas edərək, özü suda batmışdı.

Hadisə şahidlərinin sözlərinə görə, Əhliman yaxşı üzə bilsə də, Güldəstəni maşından çıxararaq xilas etmək üçün çox əziyyət çəkib. Əhliman qışqırmağa başlayıb ki, kömək edin, daha taqətim tükənir. Bunu eşidənlər maşınlarını saxlayaraq Kür aşağı sahillə ona tərəf qaçmağa başlayıblar. Qaçanlar arasında Türkədi kənd sakiniDəyanət Maqsud oğlu Şıxəliyev də olub. Dəyanət qızcığazı xilas edən Əhlimanın bərabərinə çatdıqda heç kimə qulaq asmadan suya atılıb və onlara tərəf üzməyə başlayıb. Əhliman qızı Dəyanət onlara 2-3 metr qalmış ona tərəf itələyərək batıb. Dəyanət isə uşağı tutub sahilə doğru üzməyə başlayıb. Ancaq onun da taqəti tükənməyə başlayanda ona tərəf kəndir atıblar. Beşinci cəhddə Dəyanət kəndiri tuta bilib və özü də, qız da xilas olub.