Ermənilərin Qarabağa qayıdışı məsələsi gündəmə gətirilməməlidir.

Axar.az Teleqraf-a istinadla xəbər verir ki, bunu Ermənistan Baş naziri Nikol Paşinyan deyib.

“Ermənistan Bakı, Sumqayıt, Gəncə və Qarabağı tərk edən ermənilərin geri qayıtması məsələsini gündəmə gətirməməlidir. Çünki buna “güzgü prinsipi” ilə cavab verilə bilər”, - baş nazir qeyd edib.

Nikol Paşinyan bu iddianı “Qarabağ ermənilərinə qarşı cinayət” adlandırıb.

“Bu gün Qarabağ ermənilərinin Ermənistanda məskunlaşması üçün milyardlarla pul xərcləyirik. Amma “üçbaşlı müharibə koalisiyası” (Samvel Karapetyan, Robert Köçəryan və Qaqik Sarukyan) Qarabağ ermənilərini qızışdırmaq üçün hər şeyi edir”, - Ermənistan rəhbəri vurğulayıb.

Paşinyan əlavə edib ki, ermənilərin Ermənistandan başqa kənarda vətənləri və dövlətləri yoxdur: “Vətən dövlətdir və dövlətdən kənarda vətən yoxdur. Eyni məntiqlə Ermənistan da başqaları üçün vətən hesab edilə bilər”.

Ermənistan Baş naziri Qarabağ məsələsinin birdəfəlik bağlandığı fikrini növbəti dəfə təkrarlayıb.