Türkiyə Prezidenti Rəcəb Tayyib Ərdoğan Bakıda keçirilən Bakı Enerji Həftəsinin iştirakçılarına məktub ünvanlayıb.

Axar.az xəbər verir ki, məktubu Türkiyənin energetika və təbii sərvətlər naziri Alparslan Bayraqdar oxuyub.

Ərdoğan bildirib ki, bölgədə baş verən hadisələr Azərbaycanla enerji sahəsində atdıqları addımların nə qədər düzgün olduğunu bir daha göstərir. O qeyd edib ki, region üçün vaxtilə xəyal hesab edilən bir çox meqalayihəni Azərbaycanla birlikdə uğurla həyata keçirməyə davam edirlər.

Ərdoğan Azərbaycanla başladılan və Gürcüstanın da töhfələri ilə tamamlanan Bakı-Tiflis-Ceyhan, Bakı-Tiflis-Ərzurum və TANAP layihələrinə toxunaraq, “Azəri-Çıraq-Günəşli” və “Şahdəniz” tərəfdaşlığı sayəsində Azərbaycanla əməkdaşlığın daha da dərinləşdiyini vurğulayıb.

“Ötən il istifadəyə verilən İğdır-Naxçıvan qaz kəməri Naxçıvan bölgəsinin enerji təhlükəsizliyini dəstəkləyir və möhkəmləndirir. Türkiyə ilə Azərbaycan arasında elektrik sahəsində əlaqələr bizim üçün strateji əhəmiyyət daşımağa davam edir. İnşallah, Türkiyə, Azərbaycan, Gürcüstan və Bolqarıstan arasında “Yaşıl Elektrik Enerjisinin Ötürülməsi və Ticarəti” layihəsinin həyata keçirilməsi ilə bütün bölgəmizin enerji təhlükəsizliyinə də töhfə verməyi arzulayırıq”, - Ərdoğan əlavə edib.